Liabe Kultuaredaktion,
Herbst is. „Da Summa is umma, muaß i obi ins Doi“, so hoaßt‘s in am oidn Voiksliad, des da Kiem Pauli gsammed hod. Es kimmt wahrscheinlich aus da Schdeiamark und hod jeda boarische und östareichische Drei- und Viergsang im Rebbatoar. Des werd da Schussa Ernst, da Voiksmuiskpflega, aa in seim Voiksmusikarchivabend in zwoa Wocha singa lossn und zwar mindenstens dreischdimmig. Früahra waar ja bei uns in Obabayern bloß zwoaschdimmig gsunga worn, hod a gestan bei Eich gschriem. Easchd seit da Kiem Paule und da Fanderl Wast de östarreichische Singweis eigführt ham, singt ma aa bei uns de oimarischen Lieda dreischdimmig. Vierschdimmig singt’s gwieß da Neibeira Chor, der morgn ganz grouß in da Münchna Philharmonie sein fuchtzigstn Geburtsdog feiad.
Des Liad basst zu dene Herbstdog, wo de Dämmerung scho friah kimmt, für uns olle, aba bsundas füa unsan Horst. Ja, es san de Dog der Horstdämmerung. Er muaß iagendwann obi ins Doi. Sei Zeit is anscheinend vorbei. A neia Bardeigott möcht se aufschwinga. A Franke schdäht vor da Diar und möcht uns Bayern regiern.
Aa des basst iagendwia zu dene Dog, denn heid feian de Narrn den Faschingsauftakt. Und da vielleicht künftige Ministapräsident zoagt se scho seit Jahren im fränkischen Fernsehfasching ois Supanarr. Heia war a ois Homer Simpson do, nachsts Johr kimmt a gwieß ois Horst!
Aba wer woaß! „Und er losst no ned aus“, hoaßt‘s in da „Medaille“ vom Ludwig Thoma üban Bezirksamtsdeana Neusigl. Und vielleicht losst da Horst ja aa ned aus! Für manche, wo de Zeit vorbei scheint, geht’s doch wieda weida.
Übrigens singan de Neibeira heid in Minga ned „da Summa is umma“, sondan wos Schwaaras. Sie singan aba koan Wagna, sondan an Haydn und aa ned de „Göttadämmerung“, sondan de „Schöpfung“. Und de Festanschbrach hoit da Otto Schily. Den gibt’s owei no. Der hod’s vom Terroristenanwalt üban deitschn Innenminista bis zum Festredna vo de Neibeira brocht. Wos iatz des ois mitanand z’doa hod?
Ganz ehrlich gsogt: I woaß aa ned.
Euer Kultualeser
Vinzenz Summerer