Zu „Koa Schlüssel“ (Glosse im Lokalteil):
Is denn des Ehrenamt gor nix mehr wert? Manchmoi is da Wurm, aber so was von drin, dass de Mößlinger Feuerwehrler da Sau graust und a Schreiberling vom Muidorfer Anzeiger a bissal verkehrt recherchiert had – a wenn er es vielleicht nur lustig moant.
Desmoi is a aber übers Ziel aussegschossen und packt de Leid o, die für koa Goid, bei jedem Wedda, zu jeder Uhrzeit und in ernara Freizeit Leben retten, Brände löschen und no ganz vui andere Sachan für d’Allgemeinheit machan. Do sogt der doch glatt, die Feierwehr hätt ned glöscht am Mößlinger Flugplatz, weil‘s koan Schlüssel ghabt ham. Na, na, wenn da des ned peinlich is, dassd des Ehrenamt durch den Dreck ziagst, dann bleib wenigstens bei der Wahrheit.
Jetzt song ma eich moi, wirs wirklich war: Der Einsatz war am Tog, do san die meisten von uns hoid in da Arbeit. Mir miassen unsa Goid nämlich ehrlich verdiena. Wenn sich aba noch fünf Minuten bei da Leidstoi koana zruckmoid (und fünf Minuten is ned vui, wennsd erst von da Arbeit weg muasst), wird a andere Feierwehr nochalamiert. De mit dem Schlüssl von uns san hoid dann kurz drauf eitroffa und der Brand am Mößlinger Flugplatz is von uns glöscht worn. Und no was: Wir san am Samstag um Fünfe in der Fria von an Einsatz hoam (oana von circa 100 im Johr), do schlafan die meisten no, wahrscheinlich a du liaber Schreiberling. Mir warn maßlos enttäuscht, wia ma dann Zeitung glesen ham. Man macht sie ned lustig über Leid im Ehrenamt, suach da andere, über de du lästern konnst und de des vielleicht eher verdient haben, aber ned uns.
Michael Jäkel
und Roland Haunberger
Kommandanten mit den
Aktiven der Feuerwehr Mößling