Liabe Kultuaredaktion,
de grouße Meldung war letzte Woch ned da Diesel-Gipfe in Berlin, wo de Autobonzn de Bolidika vaschbrocha ham, dass ma preisgünstig, aba ganz effektiv mit am Kompjutaabdäit und sonst mit da bekanntn Formel NIX de Luft väi saubara macha kon. De grouße Meldung war aa ned des Neiaste aus Amerika, wo da neie Kommunikationsschäf vom Donäld, Skaramutschi Done, glei wieda geh hod miassn, weil seine Schbrüch no gscheada warn ois wia de vo seim Schäf. Na de Woch hod es in da Zeidung des mehra um den Adel draht. De grouße Meldung in da Bolidik war, dass da Prinz Philipp in Rentn geht, mit sechsaneinzge. Eigentlich häd a scho Neinzehnhundadssechsaachzg aufhörn derfa, aba wenn sei Lis des Regiern einfach ned sei lossn möcht, dann is eahm hoid nix andas übabliem. Nix hod a eigentlich zum Song ghabt, aba des hod a do und wia. Seine Schbrüch warn zwar aa bolidisch ned ganz sauba, aba jedenfois gscheida und witziga wia de vom Donäld und vom Skaramutschi Done. Vo sich hod a gsogt, dass a da erfahrenste Gedenkdofeenthülla auf da ganzn Wäid is. Und da Prinz Philip hod‘s zu wos brocht, wos ned da Tramp, ned da Putin und ned amoi da gschbinnad Kim in Nordkorea dazuabringt.
Da Philip, hob i glesn, is a Gottheit auf da Insel Tanna in Vanuatu in der Südsee rechts oberhoib vo Neukaledonien, wo de Kannaken wohnan (Des is bolidisch übrigens ganz korrekt. De hoaßn dort wirklich so).
Ned ganz so lang wia de Lisbeth vo England hod de Kaiserin Maria Theresia in Östareich regiert. Eigentlich war ja ihr Mo, da Franz, da Kaisa, und sie bloß de Gemahlin, so wia da Philip. Aba sie hod de Hosn oghabt, weil ihra hod ois Dochda vom oidn Kaisa ois ghört. De Maria Theresia war ja letzte Woch auf da Festung in Kufschdoa ganz symbathisch, wahrscheinlich weil’s de Baumgartner Monika, wo de Muadda vom Bergdokta is, gschbäit hod. Ja, da Zigeinabaron war letzte Woch de grouße Kritik bei Eich in da Kultua. Aba ned gschriem habt’s, dass da Zigeinabaron bolidisch korrekt ja gor nimma so hoaßt, sondan de Operettn miassat Romabaron oda Dschibbsifreiherr hoaßn. Aba ganz bolidisch neitral und korrekt war de Besetzung: de Maria Theresia war aus Bayern, da Zigeinabaron war a östarreichischa Persa, de türkische Prinzessin war aus Litauen, bloß da ungarische Schweinefürst war aus Diroi.
Aba zruck zum Philip. Wenn er in seine letztn Johr richtig vaehrt wern und wirkli nix zum Doa hom möcht, dann muaß a no in de Südsee ziang. Do ziagt’s aa ned so wia z’England. Do is so schee warm, wia bei uns grod. Nix zum Doa und a boor warme Summadog wünscht aa Eich
Euer Kultualeser
Vinzenz Summerer