Liabe Kultuaredaktion,
es gibt manche Sachan, de mog ma, und andere, de mog ma ned. Wos ma weniga mog, is a Summadeadda im hoaßn Soi bei so gschätzte fünfadreißg Grod und ned Oupenär, weil de Wedaäpp gsogt hod, dass wedan werd. Und es duad dann gor nix! Genausowenig aba mog ma, wenn ma se gmiatlich um achde im Dorffest hihockt, a frische Mass vor oam schdäht und dann fangt’s dripfen o. Und a Viertelschdund schbaada schütt’s, obwoih de Wedaäpp gsogt hod, es rengad eascht noch zwäife. Wos sogt uns des? Dass bei da Äpp vorn a D obgäht.
Aba es gibt no andare Sachan, wo i ned mog: kultuarell Opernsängerinnen mit schdarkm Tremolo, Elektro-Muse und voikstümlichn Schlagasoach, aba aa Deaddaschdüggl, wo i ned vaschdeh, weil de Schbiela nuschln oda da Reschissa und da Dichta füa mi z’gscheid warn. Kulinarisch mogi aba no mehra ned: Weinbeerl im Apfestrudl und im Kaisaschmarrn, Marzipan und Kokosflockn, bittare Schokolad und Jagamoasta, Ramazotti und Averna, aa koan Aperol mit und ohne Schbritz, koane Schneckn, Muschln und aa koane Krabbn. Friahra hob i aa koan Dodal (koan Dotta füa Preißn und Nichtchiemgaua) meng, wos eigentlich heid ganz gscheid waar. Wos i aba gor ned mog, is a Obazda. Dabei muaß den doch da richtige Bayer meng. Is der doch des Marknzeichn vo na boarischn Brotzeit: a Radi und a Obazda. Der is so boarisch, dass a sogor vom deitschn Patenamt gschützt is, hob i bei Eich glesn. Des hoaßt, dass genau festglegt is, wos drin is, und des miassn mindestens vierzg Brozent Cambembert oda Brie sei. Wega dem woacha, gschdingadn Camembert mogn i aa ned. Aba iatz muaß des bei uns a kontrolliert wern, ob des aa wirkle a Obazda is, wos do da Wirt vakafft. Und zoihn muaß der dann natürlich aa dafüa.
Do braucht ma dann flächendeckend füa ganz Bayern obazde Kontrollöre. Hoit, des war foisch gschriem! Mir brauchan gnua Obazda-Kontrollöre, damit da Kaasanteil schdimmt und damit Bayern Bayern bleibt. Des is a Auftrog füa unsan Heimatminista Söda! De Kontrollöre kinnan aa gleich nochschaun, ob do Oa drin san. De ghörn übrigens ned eine in den Obazdn. Und Oa san heitzudog gesundheitsmäßig gfährlich, weil’s zwenig kontrolliert wern. Do is de Vabrauchaministerin Scharf zuaschdändig. De is aba ned so wia s‘ hoaßt, dazua hod s‘ zwenig Kontrollöre.
Aba mia is des wurscht. I mog eh koan Obadzn und aa koan Oasalod. Mia is am liabstn zur Brotzeit a Schweiza Wurschtsalod.
Macht’s und esst’s am Wochenende des, wos mögts! Des wünscht
Euer Kultualeser
Vinzenz Summerer