Liabe Kultuaredaktion,
manchmoi is scho guad, wenn ma katholisch is, oda wenn ma wenigstns in am katholischen Landschdrich wohnt, so wia mia. Dann kriagt ma aa mitten unta da Woch an Feiadog, so wia mia letztn Deansdog. In Hamburg ham s‘ garwat, sogor im boarischen Coburg, weil‘s in Coburg übawiegend evangelisch san und de glaam hoid amoi ned an de leibliche Aufnahme Mariens in den Himmel, wia da Feiadog Maria Himmefahrt richtig hoaßt. Des glaam zwar bei uns aa eha de Wenigan, wenn ma siecht, wia laar de Kirchn an dem Feiadog san. Aba säim wenn‘s a so is, muaß der Feiadog scho bleim, sunst, miaßat ma in Ostdeitschland aa Weihnachtn, Ousdan und Pfingstn obschaffa.
Jedenfois war des Weda schee, da Chiemsää, de Berg und da Himme warn blau – tagsüber –- und in da Nocht, wia’s dunkl war, san no a boor restliche Schdernschnuppen vo de Perseiden obagfoin. Es war so a richtig scheena Chiemsää-Summa-Dog.
Zweng dem keman aa scho sei hundadfuchzg Johr und no länga de Leid zu uns. No song ma ned „Turist gou houm“, so wia auf Mallorca, wo de Einheimischn langsam gnua ham vo de Turistn, aba z‘Brean geht‘s trotzdem mehra zua wia z‘Minga um fünfe am Mittlan Ring.
Vor ungefähr hundadfuchzg Johr is aa da Kauffmann Hugo vom evangelischn Hamburg oba auf Brean zong, weil‘s eahm bei uns am Chiemsää so guad gfoin hod. Und do hod da Hamburga seine Bäidl gmoin mit wundascheene boarische Drindl im Dirndlgwand und schneidige boarische Burschn in da Ledahosn mit ganz lange Wadlschdrümpf. Do hod de Tracht no andascht ausgschaud. Gamsbart hod a aa koan gmoin, aa de Breana und Atzinga Trachtla heid ganz schdoiz drauf san. Aba a Gams hod da Kauffmann und hob aa i in Brean und Atzing no nia gsehng. De bleim scho wega de Turistn am Berg om.
Bundas in Übasää san de Dog an Haufa umanand, hauptsächlich lauta junge, aus ganz Deitschland, de den Chiemsää-Summa dalem möchtn, aba koan schdaadn. Füa de ghört zum Chiemsää-Summa aa no a ganz a laude Muse dazua und a Party. I glaab ned, dass de aa Schdernschnuppn schaun. Aba i probier’s jedenfois no amoi. Wos i ma do dann wünsch, varrod i ned.
Uns wünsch i jedenfois, dass unsa Chiemsää-Summa no a boor Wocha dauad, vielleicht sogor bis Mariä Geburt am achtn oda glei bis Mariä Geburt am zwäiftn Septemba! Des waarn aa no guade katholische Feiadog. De miassat ma in de katholischn Lända wieda eiführn!
Des moant
Euer Kultualeser
Vinzenz Summerer