Liabe Kultuaredaktion,
ein Lob! Mit Eichana Zeidung, woaß ma, wos los is, woaß ma, wia ma dro is. De Woch war‘s wieda ganz interessant, weniga da wäidbolidische Teil, weil vom Tramp, vom Kim und von dem Erdogan, vo dene Gerngrouß-Bolidika, mog ma ja scho gor nix mehr lesen, aba da Lokalteil und natürlich aa da lokale Kultuateil, wobei se de Kultua zua Zeit aba eha in Erl und auf de Inseln obschbäit, do wo hoid väi Turistn san. Do schbäit dann da Berger Hans aus Sääbach mit seim Groußchor im Passionsschbäihaus, und des Simphonieorchesta vo Schanghai im Festschbäihaus, und auf da Herrninsl kimmt a Pianoschdar aus Korea. Aba ganz ehrlich, de Woch war da Lokalteil no interessanta. Im Rousnama Teil is‘ üba de Wirthauskultua ganga, üba ’s Blindwattn, des aus Süddiroi kimmt und dodrum, dass deszweng koan Maxe gibt, weil der vom boarischen Kine Max, dem Easchdn kimmt, der Süddiroi mit de Bayern und Franzosen bsetzt ghabt hod.
A harmlosara Kriag wia domois is am Sudlfäid, wo da Berga Sepp – aa aus Sääboch – sein Schlepplift nimma beim Liftvabund mitfahrn lossn mog, weil eahm iagendwia schdinkt. Und dann war noch auf da Kultuaseitn gschdandn, dass de Cubaboarischen de Kufschdoana Festung erobern.
Aba de no interessantere Gschicht is ja gestan a Seitn vorher drin gschdandn. Der Artikl war ja guad vaschdeckt, wia sunst manchmoi de Kultuaseitn. Aba i bin kurz vor da Kultua direkt drübagfoin. Der Artikl ghörad eigentlich ganz viare, der is ja aa wichtig zwengn da Wiesn. Damit ma woaß, wo ma wia dro is, wenn‘s oan noch da Wiesn no iagendwia andascht druckt, wenn ma gewissamaßen a so an Trieb hod, weil vielleicht nix ganga is und de neie Wiesnbekanntschaft oan noch da viertn Mass Bier ned gfrogt hod, ob ma ned de Briefmarknsammlung oschaun möcht. Oiso, i moan den interessantn Artikl üba den neia Puff-Tüv. Des Rousnama Herz-Ass (für den, der ‘s ned woaß, des Haus glei bei da Innbruckn) hod ois easchds Etablissement in Deutschland des Gütesiegel vom Bundesverband sexuelle Dienstleistungen kriagt. In Rousnam kon ma iatz oiso pünktlich zu da Wiesn zertifiziert schnaggsln.
Mia persönlich is des ja wurscht, weil i ghör zu de neinasiebzg Prozent da deitschn Männa, de ned fremd gengan. Des is übrigens aa gestan bei Eich in da Zeidung gschdandn. Und bloß acht Prozent da Männa gehn käuflich fremd und des angeblich ned oft. Ja, do muaß des Herz-Ass scho a bissal Werbung macha, mit seim anschdändign Puff füa Oschdandige, damit a bissal a Diridari einakimmt.
Des moant
Euer Kultualeser
Vinzenz Summerer