Liabe Kultuaredaktion,
de Woch hob i ja dank da Kultuaredaktion wieda wos glernt und zwar, dass a katholischa Bayer, eigentlich war’s a Pfäiza, aba des war domois aa Bayern, deitscha Reichskanzla und gleichzeitig, wos ja no erschdaunlicha is, preißischer Ministapräsident war – , da Graf vo Hertling. Und gwohnt hod der, so oft a kinna hod, z’Ruahpading in seina Ferienwilla. Aba lang hod as ois Reichskanzla ned ausghoidn, weil des mitm easchdn Wäidkriag ned so highaut hod, und mitm Friedn aa ned und oid war a hoid aa, so dass a zrucktretn is und aa scho im Januar 1919 doud war. Iatz liegt a am Ruahpadinga Bergfriedhof.
Vorher is a fünf Johr lang boarischa Ministapräsident gwen. Er war a ganz a katholischa, oana vo dene, den a andara berühmta Bayer easchd amoi gor ned meng hod, da Ludwig Thoma, der se ja in seine Lausbuamgschichtn noch mit da katholischen Geistlichkeit ganz bsundas schwaar do hod.
Aba wia i bei Eich de Woch aa lesn hob miassn, war da Ludwig Thoma ned bloß, wiara no in Brean in da Vakanz war und des Schiff vom Arthur im Rafenauer seim Weiha gschbrengt hod, a Lausbua, sondan wiara größa war, is a easchd privat und dann aa bolidisch no väi irga. Er war noch da Biografie vom Klaus Martin, der vo Bernau is, a rechta Weibara, der aa im Puff dahoam war. Dokta war a eigentlich aa koana, weil a sei Doktaarwat nia obgem hod. Aba des mit de Dokta werd ja in Bayern ned so genau gnamma. Do waar da Thoma aa heid no in guada Gsäischaft. Und mit da Moral is des desgleiche. Aba dass hernoch vo seine judenfeindlichn Hetzartikl im Miasbocha Anzeiga, da schbaadare braune Reichskanzla aus Östareich häd obschreim kinna, und da Thoma säiba in Hitla sei Nazibardei häd eitretn woin, des trifft an echtn Bayern hart.
Do hod ma am Deansdog bei Eich in da Zeidung dann scho bessa des Bäidl vo de dänischen Nachtigallen gfoin, de nachste Woch bei de Traunschdoana Sommerkonzerte schbäin. Des san da Hasn, de Nachtigallen! Do hört ma se sogar gern a dänische Klassik o, wenn ma de siecht. Aba ma soiad ned moana, dass des „Nightingale String Quartet“ bloß im säibign aftretn duad, aa wenn s‘ da Thoma gern so gsehng häd. Des san ganz anschdändige Musikerinnen, und der Scherz war iatz ja aa eha a bissal arg platt, plump und geschmacklos. Sexistisch sogt ma heit dazua. Aba wenn‘s ned mehra is!
Des moant
Euer Kultualeser
Vinzenz Summerer