Liabe Kultuaredaktion,
mi gibt’s aa no. I bin no ned im Ruheschdand, aba i hob a boor Wocha Erholung vo da Kultua braucht und bin einfach a weng furtgfahrn. Ganz weit weg auf La Palma, a Insl vo de Kanaren, wo rein kultuarell wenig los is. A boor oide Kirchn schdähn umanand vo fuchzehnhundadirgendwos, weil de Schbanier de Insl eascht vierzehnhundadzwoaraneinzge erobert ham. Genau in dem Johr, wo da Kolumbus Amerika entdeckt hod, ham’s dort scho amoi so a kloane Eroberung ausprobiert und de Einheimischn, wo fuchzehnhundad Johr vorher vo da Sahara umakema san, a bissal massakriert und vasklavt. De, wo übabliem san, san daaft und katholisch gmacht worn.
Aba des waar‘s iatz a scho vo meim Urlaub. Iatz bin i wieda do und häd, weil i ja ned do war, boid übaseng, dass bei uns nachste Woch ned bloß am Mittwoch, sondan aa am Deansdog Feiadog is. Do häd i gschaut, wenn ma am Mondog da Butta ausganga waar und i am Deansdog ganz alloa im Büro gschdandn waar.
Drent in La Palma, war, weil’s zu Schbanien ghört, am zwäiftn Oktoba Nationalfeiadog. Koane Semen, koa Butta, koa Wein! Sogor da Lidl hod dort zuaghabt. An dem Dog hod da Kolumbus Amerika entdeckt und de Schbanier ham deszweng fast an ganzn Kontinent erobern kinna – ned bloß La Palma und de Kanaren. Z’Amerika war aa an Haufa zum Hoin!
Bei uns is am Deansdog a einmaliga Feiadog, weil vor fünfhundad Johr da Lutha seine fünfaneinzg Thesen an de Schlosskirch vo Wittenberg onegschlong hod. Woher soi i des aba im katholischn Schbanien wissn?
Manche angeblich obarechtgläubign Hundadfuchzgprozent-Katholikn, füa de aa da Papst Franziskus scho vom rechtn Glaubn obgfoin is, hoitn den Lutha Martin ja füa de rechte Hand vom Luzifa. Oda war‘s da linke Pferdefuaß? Jedenfois ham se des Luthaschdückl in Endorf heia väi weniga Leid ogschaut wia de Heilignschbiele de Johr vorher. Do san ganze Busladungen aus Niedabayern, da Obapfoiz und sunstigen katholischn Landn ausbliem.
I gfrei mi ja üba an jedn Feiadog, aa üba an lutherischen. Vor mir aus kannt der jeds Johr und ned bloß olle fünfhundad Johr sei, nochdem uns neinzehnhudadfünfaneinzge mit dem Buß-und Betdog da oanzige evangelische Feiadog gschdricha worn is, damit de Pflegeversicherung finanziert werd. Des war a supa Idee!!!
Des waar aa vor fünfhundad Johr a guade sechsaneinzigste These gwen, dass in Bayern jeds Johr am 31. Oktoba a evangelisch-lutherischa Feiadog is! Des is auf jedn Foi bessa wia des amerikanische Hellouwien!
Des moant
Euer Kultualeser
Vinzenz Summerer