Liabe Kultuaredaktion,
iatz ham ma de bsundane Feiadogswoch hinta uns. Ma waar ja boid durchanand kema, wos füa Dog übahaupt is. Und dann no a de Zeitumschdellung! Do damit doan se manche Leid schwaara wia de Küah. Jedenfois is de Gräbarälli wieda vorbei. De Vawandtn ham danoch beim Kafä den ganzn Kuacha zsammgessen, bloß a boor Weana Wüaschdl vo da Brotzeit san no übrigbliem. Aba zünftig war‘s. Fast so schee wia Weihnachtn.
De Evangelischn ham eahnan fünfhundadstn Reformationsdog aa fast guad umebrocht. Iatz miass ma alladings wieda fünfhundad Johr auf den nachstn Reformationsfeiadog wartn, wenn ned de neie Regierung den doch no eiführt. Auf den kanntn se de Dschamaikana vielleicht einign, wenn sunst scho nix gäht. Fast guad, hob i gschriem, weil ganz am Schluss am Deansdog auf d‘Nocht waar säim an Lutha Martin de Feiarei z‘väi worn, wia in da Berlina Meazedes-Benz-Arena üba viertausend Sänga des Lutha-Pop-Oratorium gsunga ham. Des war fünfhundad Johr noch dem Thesenanschlag a Kultuaanschlag.
Es muaß hoid ois owei größa und gewoidiga wern. Aba is des deszweng scheena, bessa oda vanünftig? De Masse macht‘s ned oiwei aus. Da Berlina Flughafn is heid no ned fertig. Andascht wia da Koloss im Hafn vo Rhodos, der vor ungefähr zwoatausenddreihundad Johr in zwölf Johr baut worn is. Dann is a aba noch sechsasechzg Johr zsammbrocha. Moi schaun wia lang de Elbphilharmonie im Hafn vo Hamburg ganz bleibt. Do war heia scho wos kaputt. Aba füa 800 Millionen ham de Hamburga hoid iatz a scheens Wahrzeichn. Friahra war’s da Hamburga Michel. In Rousnham is des Wahrzeichn da Turm vo da Nikolauskirch. Da foische Obelisk vorm Lokschuppn waar zwar aa wos, aba der is a weng z’windig und z’wenig houch und kimmt vor Weihnachtn wieda weg, wenn se de Pharaonen aus Rousnam vaabschiedn.
Aba wia i bei Eich glesn hob, hod iatz dann Rousnam aa sei Philharmonie. Und weil Rousnam am Inn is, hoaßt de nadürle Innphilharmonie. De kimmt aba zum Glück ned so deia wia de Elbphilharmonie, sondan is füa de Schdod ganz billig zum hom, weil‘s nix baun muaß. Da Rousnama Musikvarein nennt se iatz aa so, weil der Nam moderna und ned so oidvaderisch is. Aba bei Innphilharmonie denkt ma nadürle aa an iagendwos Gewaltiges, wos Bsundas, wos Wahrzeichnmassigs. Do miassn se da Dirigent Mandl und seine Musika scho a weng oschdrenga.
I, da Summerer Vinzenz, häd oan guadn Rat an de Innphilharmonika: Singt‘s und schbäit’s bloß koa Lutha-Pop-Oratorium, bleibt‘s am Inn beim oidn Bach! Dann werd‘s scho. Des moant
Euer Kultualeser
Vinzenz Summerer