Liabe Kultuaredaktion,
nix is einfach. Ma woaß manchmoi ned, wos ma denga soid. Ma woaß ned, ob ma Mandal oda Weibal is.
Do sogt de Bundeskanzlarin in da Klimakonferenz in Bonn, dass da Klimwandel de Schicksalsfrog vo da Menschheit is, aba da Diesel derf ned deiriga, de Koihn miassn weida vahoazt wern und a Vakehrswende derf’s aa ned gem. Oiso füa an jedn freie Fahrt in seim möglichst groußn Suv! Des moant wenigstns so ungefähr da Scheuer Andi vo Bassau, wo am Horst sei Generalsekretär is.
De Gastgeba in Bonn san eigentlich die Fidschi-Insln, wo Schiss ham, dass sie in a boor Johr untagehngan. Den gleichen Schiss ham unsare boarischn Schwarzn aa. Aba den brauchadn s’ ned hom, denn Dschamaika geht ned so schnäi unta, de Insl is ziemlich bergig, direkt unwegsam. Koan Dschamaika-Weg hod ma aa bis Freitogfrüa in Berlin gfundn. Do duad ma se schwaar, bsundas unsera Schwarzn, wo de doch rein farblich guad zu Dschamaika bassn daadn. Dort san de meistn Leid aa eha dunkla.
Dschamaika is iatz aba füa den oan oda andan Bassaua dann doch zu brogressiv. Wer woaß, wos mit Dschamaika no ois auf uns zua kaam, wo doch heia in Übasää am Chiemsää de letztn Dschoints scho gracht worn san! Nachsts Johr gibt‘s dort koan Rägge und koan Rock mehr. Aus is mit de Rastafaris am Chiemsä!
Aba wenn da Scheuer
Andi moant, in Bayern werd ma iatz wieda ganz konservativ, dann täuscht a se, denn wos hob i bei Eich de Woch in da Zeidung glesn? In Buachboch, z‘Mäihdarf hint, fast scho in Niedabayern, gibt’s heia koan Faschingsprinz samt Prinzessin, sondan zwoa Prinzessinnen!
Do schaugt a, da Andi. Wia häd a easchd gschaugt wenn de zwoa Prinzessinnen ausm Senegal gwen waarn und fuaßboigschbäit und ministriert hän! Weil de mog da Andi bekanntamaßen gor ned. De hoit a füa bsundas gfährlich. Do häd aa dann aa nimma gwusst, ob a Manderl oda Weibal is. Aba des braucht ma aa nimma wissn, hod unsa Bundesverfassungsgericht festgschdäiht. Des fordert a drittes Geschlecht, füa de, wo se unsicha san!
Des is nix füa Bassaua wia am Scheuer Andi.
Des moant
Euer Kultualeser
Vinzenz Summerer