Liabe Kultuaredaktion,
ja so a Übaraschung am letztn Sondog. Ned dass des mit Dschamaika nix worn is, sondan dass do dro ned unsa Horst schuid war oda da Tschem vo de Greana, sondan da nette Schwiegasohntyp, da Lindna Christian. Der war da grouße Schissa. Liaba ned regiern ois wia foisch, hod a gmoant und is ganga.
Liaba ned entscheidn ois foisch, denkt se scho lang da Horst und da Angela sogt ma‘s aa noch. Und so woaß ma owei no ned, wia‘s in Minga und Berlin weidagäht. Gäht a oda bleibt a, da Horst? Werd a’s oda werd a’s ned, da Markus? Und wos macht de Angela? Wos machen des Sozen? Wos werd übahaupts? Es werd übahaupts no manche Übarraschunga gem.
Da Lindna Christian jedenfois is iatz amoi draußt. Er hod iagendwia sei Ruah. Liaba gor ned arwatn ois wia foisch, hod se ned bloß da Tscharlie vo de Münchna Gschichtn denkt, aa da anda Knecht in da Bibl, wia a sei Talent vagrom hod. Des hod iatz im Gleichnis dem Herrn gor ned gfoin. Er hod‘n an fauln Knecht ghoaßn, hod eahm sei Talent gnomma und in de Finstanis zum Zähnknirschn gschickt. Oisa des werd am Lindna gwieß ned bassiern. Der macht eha Urlaub auf de Malediven und losst an Sand zwischen de Zechan knirschn. Vielleicht trifft a dort dann den Horst, wenn der doch no sei Ruah hom möcht.
Ihr Ruah woid aa de Obakasa Mare vom Geiglschdoa. Die zeaschd am Berg aufeganga is und dann aba bliem is, andascht wia da Lindna. Ihr Lem lang is bliem auf da Oim. Sie hod se dafüa entschiedn ghabt – und garwat hod‘s aa ihr Lem lang. Des Lem war ned bloß ruhig und schee, aa hart und einsam, dort drom auf’m Berg.
Da Lindna Christian waar dort nia bliem. Aba i war scho amoi dort aufm Geiglschdoa, bei da Mare, aa wenn’s iatz scho ganz schee lang her is. Auf jedn Foi hod ma do om wos lerna kinna: Dass‘ a bissal entschbannta aa geh ko. Wern ma oiso a bissal lässiga, a bissal entschbannta, a bissal dschamaikanischa aa ohne Dschamaika. Und a Gros, wia ma des angeblich in Dschamaika gern racht, braucht ma do aa ned dazua. Es langt scho a Glasal Glühweihn. Und des gibt‘s schbaadestens in oana Woch wieda auf jedn Christkindlmarkt. Und des is iatz gor koa Übaraschung.
Des moant
Euer Kultualeser
Vinzenz Summerer