Liabe Kultuaredaktion,
de Woch soiad ma de Antwort eifoin, wos Scheenas gem kon ois wia drei Nürnberga Rostbrotwüaschd im Weggla, an Markus Söder als Ministapräsidenten und Silvesta am vierazwanzigstn Dezember. Oiso ganz ehrlich, da foid ma väi ei, wo i doch am liabstn Debrezina mog. Und da Heiligomd am Vierazwanzigstn is ma aa liaba wia Silwesta. Und bolidisch mog i mi vor dem Fest ned ausseloahna, deszweng sog i zum Söda Markus ois neiem Landesvadda in schbe glei gor nix.
De Frog in meim letztn Brief war ja aa ned ganz ernst gmoant. I wissad so väi scheenane Sachan. Am scheenstn war ma iatz aba a schdaada Advent, wia a in jedm Adventssinga gsuacht werd. Und in jedm Adventssinga werd vom Schbrecha gjammad, dass den nimma gibt. Und olle Leid wern nervös und imma nervösa, weil‘s Christkindl boid kimmt und no so väi z’doa und so väi eiz’kaffa is.
Do sog i grod oans: Obafahrn, entschbannen. Es kon nix Scheenas gem wia nixdoa. Deszweng hör i iatz aa sofort zum Schreim auf und wünsch no an ganz schdaadn drittn Advent!
Euer Kultualeser
Vinzenz Summerer