Liabe Kultuaredaktion,
morng is endlich soweit. Des Christkindl kimmt und de schdaade Zeit mit ihram ganzn Eikaafs-, Herricht- und Weihnachtsfeiaschdress is endlich vorbei. De Kinda san aba scho ganz nerväs, wos Christkindl bringt. Oiso in Bayern und aa no in Nordrhein-Westfalen, weil im Rest vo Deitschland schreim de Kinda ned ans Christkindl, sondan an den Weihnachtsmo. Der is ja aa durch Coca Cola und de amerikanischn Weihnachtsfilmschnuizn väi berühmta. Des hod jedenfois Gugl bei na Onleinbriafanalüse aussagfundn. Vier Fünftl da Kinda schreim in Deitschland demnoch an den Weihnachtsmo. Aba des is ja wurscht!
De Kinda san jedenfois nerväs und unleidig, ob iatz des Christkindl oda da Weihnachtsmo kimmt. Deszweng is des Gscheideste, glei am Namedog mit’m Baba oda da Oma oda am Opa in de Kindamettn z‘geh, damit de Mama dahoam füa de Bescherung herrichtn kon, oda in am moderna Haushoit doch da Baba.
Aba ned bloß de Kinda san nerväs, sondan aa ganz väi grouße Leid. Sie füachtn hoit, dass‘ ned a so werd, wia ma se Weihnachtn so vorschdäit und wünscht, wia‘s sei soiad: voia Harmonie und mit Schnäa.
Aba des is einfach z‘väi valangt. Scho is a wieda weg, da Schnää. Meistens is‘ grea, sogt de Wedaschdatistik – und des seit fuchzg Johr, wenn ma ned grod in Sachrang wohnt. Und mit da Harmonie is des hoit aa so a Sach, wenn ma no vom Advent gschdresst is. Und wenn dann des Christkindl oda da Weihnachtsmo no des Vakehrte bringt, dann kon‘s am Heiliomd scho a bissal schwierig wern.
Aba wos, sogt da Engl zu de Hirten: „Fürchts eich ned!“ Und i sog dazua: „aa ned vor dem Heiliomd!“. Des werd scho!
Ganz entschbannt bleim! Des wünscht
Euer Kultualeser
Vinzenz Summerer