Liabe Kultuaredaktion,
iatz is scho wieda soweit. Des oide Johr is fast vorbei. Ois schaud zruck, jeda Fernsehsenda, jede Zeitung, säim da Dschango Asül im Ballhaus. Wenn’s ma iatz säim ned so guad geh daad, miassat i bei meim Rückblick direkt däbrässiv wern.
Da Tramp in Amerika is no bläda, ois wia ma letzts Johr gfürcht hod. In Deitschland wart ma oiwei no auf a Regierung, weil da scheene Lindna iagendwia Schiss kriagt hod, und in Östarreich ham’s dafüa den jüngstn Bundeskanzla. Und damit da Kurz ned an Nama entschbrechend sichtig is, hod a se an rechtn Beischdand ghoit, obwoih er mit dem, glaab i, glei gor nimma richtig siecht. Da Kurz hod aa glei an östareichischn Pass für die Süddiroia gfordad, damit de leichta hoam in de Oipnrepublik kinnan. Ma schaut hoid bolidisch zur Zeit gern zruck auf de oide Größe.
Do kannt ma iatz aa Baiern in de Grenzn von neinhundadfuchzge fordern, ohne Frankn und an Ministapräsidentn Söda, aba dafüa bis Obakrain und mit Zuagang zur Adria. Wean kinnan dann de Ungarn hom, und Östarreich gibt’s gor nimma.
Ja, ois soid bei manche sei wia friahra, weil’s do angeblich bessa gwen waar. Gestan hob i a I-Mäil kriagt. In dera hod oana füa a islamfreies Europa gworbn – zum Schutz vo unsere Frauen. I glaab ja, der hod eha Angst, dass a säiba koa deitsche Frau mehr dawischt. Aba iagendwo vaschdeh i eahm scho. Mia ham domois de Antworta Buam aa unsare Diandl ned vagunnt. Mia san domois aa füa a antwortafreie Liegewiesn gwen.
Aba ma soid dem Oidn ned nochtrauern und soid se aa ned üba des Vagangene ärgern. Schau ma liaba viare wie zruck und hoff ma auf des Johr Zwoatausendachzehn!
An guadn Rutsch wünscht
Euer Kultualeser
Vinzenz Summerer