Liabe Kultuaredaktion,
iatz is des Johr scho fast vier Wocha oid, und i hob endlich wieda Zeit, dass i Eich schreib. I war noch Neijohr a bissal aushäusig.
I häd ja gmoant, es waarat kultuarell nix los, nochdem de Narren de Regierung übernomma ham. Oiso, i moan iatz ned de bolidische Regierung, sondan scho unsare Faschingsmonarchen. Und mia ham ja, obwoih des Johr scho so oid is und de Woih scho vier Monat her, oiwei no koa neie Regierung, sondan oiwei no de oide, de aba eigentlich gor nix mehr entscheidn derf.
Aba wos is? Eigentlich geht‘s uns ganz guad damit! Und wenn nix entschiedn werd, dann werd aa wenigstns nix Foischs entschiedn!
Ja, de Sozen und eahna Martin kinnan oam ja eigentlich leid doa. Do woidn s’ doch eigentlich partu ned regiern und bloß weil de andan übahaupts mitanand ned meng ham, daad ma eahna iatz vorschmeißn, weil‘s doch iagendwia regiern missatn. Bei uns sogt ma do: Orschkartn zogn!
Aba üba des woid i ja eigentlich gor nix schreim. Mi wundad‘s, dass so väi los war, obwoih i ned dahoam war. Des hob i ois in de oidn Zeidunga nochglesn, wo ma de Nachbarn aufghoitn ham. I bin ja oiwei no z’bläd, dass i Eicha Onleinzeidung aufmacha kon!
Kultuarell hob i anscheinend wos vasammt, zwäif rockende Tenöre warn do, des Nilpferd Amanda, de Amäising Schädous mit eahnana Schattenschou, a Webba-Gala mit Mjusikälouanwürma, dann da Willy Astor desmoi mit Inselsound und ohne Versal, da Buachna Hans-Jürgen und Haindling in da Badriahalle, da Schuch Thomas vo Steffeskira im Antretta-Soi mit wirklich gscheida Klaviermuse, da ungarische Geingvirtuose ohne Frack und in da Tschiens in Oabling und dann no an Haufa Neijohrskonzerte. Und mitn Kendlinga Matthias vo Schwendt in Diroi und seine ukrainischen K&K-Simphonika geht’s mit da Neijohrsgala morng im Kuko aa no Ende Januar weida. Aa de Bruckmäia Bloskapäin hod morgn no a Neijohrsmatinee, oisa a Konzert am Vormidog. Es braucht hoid zur Zeit ois sei Zeit, ned bloß a neie Regierung. Vielleicht gibt’s aa no eha a Neijohrskonzert am Boimsonndog wia a neie Regierung!
So, und wenn des ganze iatz a gor ned dazua basst: Des größte Ereignis war scho, dass da Dreßen Thomas vo Mittnwoid letztn Samsdog am schnäistn de Schdreif in Kitzbühe obegfahrn is. Der is übrigens gor koa richtiga Voibayer, sondan in Jülich geborn. Des is ned weid weg vo Würselen, wo da Schulz Martin her is. So schlecht, wia manche moanan, kinnan de Leid vo do om oiso aa ned sei.
Des moant
Euer Kultualeser
Vinzenz Summerer