Liabe Kultuaredaktion,
de Olymbischn Schbiele san gestan in Pyeongchang oganga. Wia hoaßt iatz des aba? Es schaut ausschbrachemassig ganz schwierig aus, hoaßt aba ganz einfach: Pjöngtschang. Do is Ruahbbading füa preißische Winterschbortreporta (und andere gibt’s äh kaam) scho schwieriga. Des hod no koana vo dene richtig ausgschbrocha.
Aba wos iatz de Woch no wichtiga war, is, dass ma iatz an Bundesheimatminista ham, und dass des da Horst is!
Ja, mia ham vielleicht sogar ganz beschdimmt boid amoi a neie Regierung. Ganz schbortlich und direkt rekordvadächtig, ja fast scho olymbisch ham s’ vahandelt. Bloß bei da Angela war anscheinend desmoi de Kondition schlecht, moanan manche vo ihra Bardei, dene des Ergebnis nes so basst hod. Väi bessa war de Kondition beim Horst, der war noch vierazwanzg Schdund Vahandlungsmarathon ohne Schlof no ganz frisch und hod grod a so grinst. Vielleicht war a ja dopt?! Des is ja heid ned unüblich. Oda er hod se einfach so gfreid, weil a wieda in Berlin Minista wern derf und endlich vo Ingoischdod furt kimmt. Es hod eahm ja aa scho friahra in Berlin gfoin, scho alloa wega de guadn menschlichn Kontakte, de ma do kriang kon und so weida. Aba mehra mecht i do dazua wega da Intimspähre ned schreim. Do muaß ma heitzudog aufbassn!
Jedenfois gfreid se da Horst wia a Schnääkini oda gor wia a Olymbiasiega, weil eahm des Nilpferd Amanda vom Fasching in Frankn oiwei no liaba mog ois wia den Söda Markus und er den Markus iatz aa no übatrumpft, denn da Horst werd ja ned bloß neia Innenminista, sondan aa no Bundesheimatminista. Und da Söda hod’s bloß zum Heimatminista vo Bayern brocht. Wos iatz da Horst ois Bundesheimatminista macha muaß, is no a Geheimnis. I bin dafüa, dass a Boarisch ois easchde Fremdschbrach in da Schui eiführt, und dass Eisschdockschiaßn, Schofkopfa und Schuahplattln olymbisch wern. Füan Schbort is a nämle aa ois Innenminista zuaschdändig. Aussadem ghörn unbedingt de preißischn Schbortreporta im Fernsehen ausgwechslt und „Dahoam is daoam“ ghört endlich ins easchde Programm, damit ma in ganz Deitschland woaß, wia so a „Heimat“ richtig ausschaut, wos „dahoam“ is.
Des kannt a scho fertig bringa, da Horst. Bayern först!
Des hofft
Euer Kultualeser
Vinzenz Summerer