Liabe Kultuaredaktion,
da Fasching is vorbei. De Fastenzeit is do, de Zeit da Buße. De Berufsgrantla und Oweziaga., wo oiwei ois ganz furchtbar findn, moanan, dass sie agrad iatz grod lustig weidaschimpfa kinnan, weil ja angeblich ois ganz furchtbar is.
Ja, manche ham scho im Fasching ganz schee biassn miassn, bsundas da Schulz Martin und die Sozen und unsa Angela aa no damit. De biassn sogor füa Sachan, wos‘ gor ned z‘schuid san. De Sozen hän ja gor koa Regierung mit da Angela meng, aba wenn se da Lindna einfach davo macht! Aba da Martin is scho aa säim z‘schuid. „Nia mit da Angela! Nia Minista!“, hod a gsogt.
Ja, ma muaß wissn, wann ma wos sogt. Ma muaß wissn, wann ma wos füa an Witz macha derf und wann wos bluadig ernst is.
A Witz, bsundas a schlechta, der gor koana is, kon manchmoi ganz vakehrt sei. Des hod de Oidneihausa Feiawehrkapäin beim Fasching in Frankn gschbannt. Seine Witz warn heia so schlecht, dass sogar na Tomatn des Roudwern vaganga is.
Bsundas iatz, wo de Mia-aa-Debatte lafft, muaß ma wissn, wos und wo ma wos sogt, und aa wo und wia ma hilanga derf. Aa im Fasching is ned ois dalabt, aba iatz in da Fastenzeit soid ma se no a bissal mehra zruckhoitn, ned bloß beim Essen!
Buße bedeit ja eigentlich ned, dass ma furchtbar gschdraft werd, sondern bedeit eigentlich Umkehr. Aba wenn’s zu na Umkehr ned ganz glangt, dann daad’s scho langa, wenn ma se a bissal zruckhoit, a bissal obafahrt, a bissal übalegt, bevor ma jedn Schmarrn auselosst. I moan damit olle, wo oiwei ois no väi bessa wissn: de Bolidika und aa de im Fernsehen, im Fazebuk und in de andan asozialen Netzwerke, am Schdammdisch und dahoam auf da Coutsch,
I werd mi übrigens iatz in da Fastenzeit aa a bissal zruckhoitn. I werd heit des Kaasbrot um zehne auf d’Nocht nimma essn.
Des vaschbricht vielleicht ganz beschdimmt
Euer Kultualeser
Vinzenz Summerer