Liabe Kultuaredaktion,
„s Lem is wia aa Traum“ hod de Speider-Mörfi-Gäng friahra gsunga. Fast vierhundad Johr friahra hod da Pedro Calderón de la Barca sei Deadda „Lem is a Draam“ gschriem. Und in da Rousnama Vetternwirtschoft hod des Schdüggl da Frank Dominik mit seine Leid gschbäit, wia imma bsundas modern, und wia imma war oane nackad. Des find da Reschissa anscheinend wichtig, oda einfach schee. In dem Foi war‘s de Hauptfigur, da Sigismondo, wos beim Frank a Mädl gschbäiht hod, weil de hoid nackad aa bessa auschaut, moan i. Jedenfois war des Gschbäi ganz interessant und sogor guad, hod Eicha Kritika gmoant. In dem Schdiggl woaß da Sigismondo, den sei Vadda, da Kine, in an Turm hod schberrn lossn, jedenfois ned, wos Draam und Wirklichkeit is, wia s‘n auslossn ham. Und beim Frank Dominik seina Inszenierung hod ma se glei gor nimma auskennt.
In da schdädtischen Galerie ist grod a Wiesn-Ausschdellung. Aba de Wiesn, wo da Pytlik Andi gmoit hod und in da Rousnama Schdodgalerie ausschdäiht, san nadürle koane wirklichn Wiesn zum Sehng, sondan Bäidl. Aba is heid a wirkliche Wiesn no wirkle a Wiesn, wenn de Bienen vo lauta Pflanzenschutzmittl wia friahra de Schdarfeita obschdürzn und wenn heid da gsündane Honig aus da Schdod kimmt?
Wos is iatz a Draam und wos is wirkle? Des Schdiggl und de Ausschdellung san ganz aktuell. Bsundas väi junge Leid, de mit da Nosn an ganzn Dog an eahnam Smartfoun babban, oda de andan de eahnan, ja Orsch, ned vom Kanabä wegbringan und den ganzn Dog de Soafnserien und Fäikreportaschn im Privatfernsehn oschaun, bringan des Lem und den Draam aa gern amoi durchanand. Sie wissn nimma, wos is wirkle. Sie wissn nimma, wos wohr sei kannt. Is‘ im Deitschland vo da Angela wirkle so furchtbar, wia‘s de AfDler und eahnane Symphatisanten moanan? Werd ned in de Artikel im Fäisbuck und de andan asozialen Medien väi mehra glong wia angeblich in da normalen Bolidik und in de de ganz normalen Zeidungen?
Da Sigismondo im Schdiggl woaß jedenfois aa ned, wos wirkli is und wos auf eahm zuakimmt.
Wos kimmt und wos sei werd, wissn ma de Woch aa ned. Mia wissn jedenfois, dass’ schbannend werd. Werd iatz da Markus unsa Ministapräsident? Gäht da Horst noch Berlin und werd a Supaminista oda schbäit a künftig im Kella mit seina Eisenbahn? Wos macht am Mondog de Angela? Und des ois hängt agrad vo de Sozen ob. Meng de iatz a grouße Koalition oda möchtn se de in de nachstn fuchzg Johr in da Opposition erneiern?
Ja, wenn die Mitglieda vo de Sozen ned meng, dann kannt‘n des väi Leid füa an schlechtn Draam hoitn und uns kannt no a bolidischs Drama draama. Dann kannt‘n aa väi Bolidika aufamoi aufhörn oda aa bleim – wia da Horst, wenn a doch ned Supaminista werd.
Oane jedenfois geht gwieß. Des is ned de Angela, des is de Kinsäha Luise. Sie hört am Nockherberg ois Mamma Bavaria auf. Des is auf jeden Foi schod.
Des moant.
Euer Kultualeser
Vinzenz Summerer