Liabe Kultuaredaktion,
letzte Woch war in Brean scho Mitfastnmarkt – und i hob no übahaupt nix obgnomma, wo doch des innere Bauchfett so schädlich is, hob i bei Eich in da Zeidung glesn. Nadürle ned inda Kultua, aba i les de andan Seitn aa manchmoi. Oiso, mei Wampn is no do, obwoih heid a guade Figur ogsogt is. Allerdings is de Vorschdellung vo Schönheit ned zu olle Zeitn und Kulturen de gleiche gwen. Am Maler Rubens ham vor vierhundad Johr de Damen dicka gfoin. Und aa füa de Südsääinsulana is dick schee.
Bei uns is des aba heit andascht. Und es werd owei schlimma. Vor drei Johr is da Pumuckl scho dünna worn. Und de Heidi hod aa obgnomma, und sogor de Biene Maja is dünna worn. Iatz hod‘s de Croft Lara dawischt. Im Compjutaschbäi Tomb Raider hod‘s no schaun miassn, dass ned vornübakippt, weil’s so guad beinand war. Im easchdn Film hod de Anschelina Scholie aa no ganz propa ausgschaut. Und iatz schbäit de im neia Tomb-Raider-Film de Vikanda Alicia de Lara Croft. Und wos is? Nix mehr vorn dro, direkt flach. I woaß, vorgestan war da Internationale Frauendog. Do muaß ma se ois Mo scho übaleng, wos ma sogt oda schreibt. Aba i bin iatz koa Westndaschnsexist. Des is koa Zeichn vo Geringschätzung. Des is koa Frauenfeindlichkeit, sondan des Gengteil. Denn wern ned mit dem Mogawahn de Foastan diskriminiert? Miassn denn olle so dünn wern wia an Lagafäid Karl seine Laafschdegdianein, de er iatz sogor scho in am Indoorwoid auf- und ob schbaziern losst. Grod a boor grunzade Wäidsai san no obganga. Dabei san de Madln de Herbstjackal wia nosse Hodan um de diarrn Knocha ghängt.
Do hod de Siegerin beim Opernfestival z‘Immling scho andascht ausgschaut. De hod ned bloß guad gsunga, de war aa guad beinand. De schaut so bessa aus, wia manche vo dene Hungahodan.
I glaab, i übaleg ma des mit‘m Obnehma no amoi.
Des moant
Euer Kultualeser
Vinzenz Summerer