Liabe Kultuaredaktion,
morgn is scho wieda Ousdan. Do werd übrigens Auferschdehung vom Messias gfeiad, ned da Geburstdog vom Ousdahos, wia owei mehra bei uns moanan! Eigentlich hän ja de Fastenzeit und de Kardog a Zeit da Ruah und da Besinnung sei soin. Kultuarell hod ma aa bei uns überoin füa Besinnung gsorgt. Oa Passionsmuse um de anda is aufgführt worn, boarisch und barock und aa no andascht.
Doch des war’s aa scho mit Fastenruah. De letztn boor Wocha, seit i eich nimma gschriem hob, is zuaganga wia sunst no wos, bsundas bolidisch. Da Putin is wieda Präsident vo Russland worn, de Angela wieda Bundeskanzlerin mim Horst ois Supaminista für Hoamat, Bau und Bolizei, und da Söda Markus is endlich Landesvadda vo Bayern. Ganz Frankn gfreid se! Und damit se ned bloß de Frankn gfrein, fahrt a iatz ganz schnäi de nachstn vier Wocha durch Bayern und übarrascht seine Landeskinda mit seim Bsuach: auf da Kampenwand und auf da Herreninsel war a scho. Ja, iatz is da Markus am Ziel. Er hod‘s dawartn kinna. Bei eahm war des koa Auferschdehung, sondern es war ganz einfach koa Umfoin. Ma häd gmoant, dass se da Horst und da Markus ned ausschdeh kinnan aba da Markus hod den Horst ned ausgsitzt, sondan ausgschdandn.
Iatz kannt da Markus bloß no Papst wern meng, denn des Amt is als oanzigs no bedeitenda wia Ministapräsident vo Bayern. Do hod a aba schlechte Kartn, denn er is vaheirat und evangelisch. Und des geht dann doch no ned, wenn aa untam Papst Franziskus mehra möglich is wia friahra unta unsam Benedikt, der iatz seit ungefähr genau fünf Johr in Rentn is. Wenn da Benedikt aa nimma so guad auf de Fiass is, geht‘s eahm doch no ganz guad, hob i bei Eich in da Zeidung glesn, weil a boor Rimschdinga mit samt eahnan indischn Kaplan, am Pata Joschi, neili bei eahm in Rom beim Kafädringa warn.
Wos da Söda Markus iatz is, möcht da Putschdämon vo Katalonien no wern: Ministapräsident. Des geht aba ned, solang a in Deitschland eigschberrt is. Der muaß iatz in Neimünsta im Gfängnis auf sei Auferschdehung ois Ministapräsident wartn. Aba des dauad länga wia drei Dog. Dem sei Passion kon no lang dauan, aba der foid aa ned um, so wia da Markus. Doch a Messias san s‘ olle zwoa ned.
Des moant
Euer Kultualeser
Vinzenz Summerer