Maikäfa

Liabe Kultuaredaktion,

fünfazwanzg Johr hob i Eich fast jede Woch gschriem und hob mein Senft dazuagem zu da Kultua im Gai und hi und do aa zu andare Sachan, de bei uns und in da Wäid bassiern. Iagendwann langt’s und es werd‘s schee langsam vo Kultuanörglarei gnua hom, hob i ma denkt!

Aba dann hod mei Frau gmoant, dass i Eich ned so einfach davokema lossn soiad. Und damit‘s es in da Rousnama Provinz aa mitkriagt‘s, wia‘s sunst in da Wäid ausschaut, soiad i Eich vo untawegs schreim, wos mia woandascht so auffoid. Des kannt Eich ned schodn, hod‘s gmoant. Deszweng werd‘s aa künftig hi und do vo mir hörn.

Iatz is‘ so weit. Neilich hob i a Schiffsroas gmacht. Guad, de war ned so weid, vo Gschdod auf de Fraueninsl. Aba säim do kon ma scho wos vazäihn. Ned des Normale, wos es moant‘s, des Kultuarelle vom oidn Klousda, vo da karolingischn Torhalle und soweida. I kon a nix vo da Turistninvasion vazäihn, weil so väi war gor ned los.

Aba dafüa hob i wos gsehng, wos manchmoi scho ganz säitn is: an Maikäfa im Mai. Auf’m Weg is a krocha. Mei Frau hod’n glei auf a Bladl ghockt, daß a ned datret werd. Aba glei drauf war scho wieda a Maikäfa auf’m Weg und dann a dabaazda und nomoi a dabaazda und nomoi oana. Und dann is links oana gflong und dann rechts, und dann hob i ma denkt, do gibt’s mehra davo. Und wia ma uns dann bei am oidn Schbezi vo meim Bruada, wo a bekannta Fischa is, a Renknseme kafft ham, hod der vazäiht, daß sie heia auf da Insl, wia scho vor vier Johr, direkt a Maikäfainvasion ham. Tausende vo Maikäfa hän beim groußn Oachbaam hintam Haus scho olle Bladl obagfressn. I hob nochgschaut und gschdimmt hod’s.

A Invasion is des nadürle ned, moanat i, weil de Maikäfa ja ned iagendwo andascht herkeman, sondan reine Insulana san. De warn vier Johr ois Engerlinge im Inselbodn. Iatz krabens aussa und wos is? Sie san auf na Insl und keman ned oba, weil’s so weid ned fliang kinnan.

Ma kannt iatz de Insulana rodn, dass sie de Maikäfa in na Nocht-und-Nebel-Aktion zsammfangan und in Gschdod wieda freilossn. Sie meng se ja eh ned so übamäßig, de Insulana und de Gschdodara! Sie kannt’n nadürle de Maikäfa aa zu Gäid macha und schdod mit eahnane Renkn de deitschn Gourmetköch mit Maikäfa varsorgn. Maikäfasuppn und kandierte Maikäfa warn friahra amoi auf da Schbeiskartn vo de bestn Häusa! Beim Inselwirt, beim Inselbräu, in da Lindn und beim Klousdawirt kanntn s‘ glei moi ausbrobiern, ob so a Maikäfasuppal okimmt. Ma kannt’s aa in na Bärlauch- oda Schbarglsuppn schwimma lossn. Oda gor grillte Maikäfa an Käfabohnensalod! Füa den, der‘s mog, des Höchste!

Füa mi aba ned moant

Euer Kultualeser