Liabe Kultuaredaktion,
do sogt de Frau, sie mechat heia ned auf Kroatien fahrn, do waar’s ihra z’hoaß, sondan auf Lübeck, und a Ferienwohnung häd’s aa scho und de Zugkartn no dazua. Und i kannt scho mitfahrn, wenn i mechat. Sie fahrat auf alle Fälle zweng am Thomas Mann und de Buddenbrooks und am Marzipan und des glei a Woch lang.
Oiso dann hoid auf Lübeck, wenn mei Frau eh scho zoiht hod. Dann gibt’s hoid koan hoaßn Fäisnschdrand mit warma Wossa, und auf d’Nocht Tschiwaptschitschi mit väi Zwieben und mit na koidn Hoibe Karlowatschko dazua.
Des geht ja scho glei guad o, hob i ma denkt, wia ma vom Bahnhof kema und am Holstentor vorbeiganga san: väi kleana wia auf dem oidn Fuchzgaschein hod’s ausgschaut und windschiaf – fast no schiaffa wia da Turm vo Pisa, aba hoid ned so houch.
Siem Dog hob i ma mit meina Frau de Schdod ogschaut und mia san ned fertig worn: Sechs riesengrouße gotische Kirchn, a Museum mit fast mehra gotische gschnitzte Altäre drin, wia’s in ganz Süddiroi gibt, a uroids Rathaus, des fast italienisch ausschaut, a Karstadt und a Peek- und Cloppenburg, de so greislich ausschaun wia überoin. Und ganz väi oide Häusa mit Gäng in vaschdeckte Hintahöf voia Rousnschdöck, wo friahra de arma Leid gwohnt ham und heid de Turistn und de, wo ses leistn kinnan. Mittendrin ham mia aa gwohnt. Guad, dass i de Bodhosn dabei ghabt hob. Glei ums oane Eck war da Krochaweiha (Krähenteich) mit Freibod, und de anda Schdrass üba de Bruckn ume is ma am nachstn Sää mit’m nachstn Freibod gwen. Nadürle extra für uns war dann aa glei drei Dog lang Oidschdodfest mit Feiawerk am Krochaweiha. Und de ganze Woch schee Weda.
Ja, eigentlich häd i ja no wos vom Willy Brandt vazäihn soin, der eigentlich Herbert Frahm ghoaßn hod und aus Lübeck war und wo im Willy-Brandt-Haus sei schlechts Abiturzeignis mit am Oansa in Religion und sei Friedensnobelpreisurkundn ausgschdäid is, und vom Günter-Grass-Haus glei danem. Und i häd vazäihn kinna, dass i mit meina Frau aa no im Buddenbrookhaus war, wos am Thomas Mann seine Großäidan ghört hod, und dass mei Frau an Haufa Marzipan kafft hod und dass i trotzdem koans gessn hob, weil i des aa in Lübeck ned mog. Aba oans muaß i do no vazäihn. Oa Schdraß weida, glei gengüba vom Willy seim oidn Gymnasium, do is des Klostereck. Da Wirt is a tätowierta Oidrocka. Bei dem kon ma heraust hocka und zuaschaun, wia am Sonndogaufdnocht de Bleameküben vom Schdodfest wieda weggrammt wern. Und dazua gibt’s an echtn Andechsa Bock. Und der is bessa wia a Marzipan und wia des kroatische Karlowatschko hell.
Des moant
Euer Kultualeser
Vinzenz Summerer