Liabe Kultuaredaktion,
manche Sachan im Lem miassat ma oamoi gmacht hom, moant ma: Dazu ghört oamoi auf da Zugschbitz gwen sei. Do gibt‘s a Seilbahn und no dazua seit heia a neie. Do kon gor nix fein, hob i ma denkt, und bin mit meina Frau aufegfahn, nadürle mit Huat, Rucksog und Bergschuah, damit ma ned glei wia a Japana, Kines, Araba oda Preiß daherkimmt.
Oiso mit hundadzwanzg Leid und zwoa Hund in de Gondl eine und zwoatausend Meta auffe. In zehn Minutn warn ma om und scho is uns schwindlig worn: meina Frau wega da dünna Luft und mia ma wega da Aussicht.
Song ma amoi aso: Aussicht obe war iatz weniga, weil‘s Näbe grissn hod, aba de Aussicht umadum is direkt ned zum Dawartn gwen, nochdemst endlich durch a betonierts Treppnhaus mit hundanzwanzg Leid und zwoa Hund noch draußn gfundn host. Dann schdäht ma dort mit Japana, Chinesn, Araba und Preißn auf da Bergterrassn. Ma glaabt gor ned, dass auf so am Berg so väi Beton Ploz hom kon: drei Seilbahnschdationen mitsamt Wirtschoft, Andenknlodn und Klo und no dazua des oide Münchnahaus vom Oipnvarein samt Wetterschdationsturm, wo heraust a Brodwurschdbroda de höchste Brodwurstseme Deitschlands vakafft.
Entahoib gäht‘s üba a Baugrüsttreppn obe und zua am Fäisn ume, des da Gipfe vom Gipfe sei muaß, weil dort a Kreiz draufschädt und se a boor do aufekraxln draun und umawingan. Üba dem Kreiz schwebt aba no da Auslega vom Baukran. No is ma mit‘m Zuabaun anscheinend ned fertig!
Auf da andan Seitn vo da Terrassn, entam Münchnahaus geht‘s direkt auf Östareich. Dene ghört anscheinend da Gipfe aa a bissal! Do is da höchste Grenzübagang Deitschlands und vo do geht‘s glei grod aus in de Diroia Bergbahnschdation eine. I hob gschaut: Koana vo da neia boarischen Grenzbolizei in Sicht. Grod guad, dass de Asültouristn aus Syrien und Afrika, wia unsa neia Ministapräsident de Flüchtling und Zuawandara ghoaßn hod, ned wissn, dass do unbemerkt eireisn kanntn. Sie dadn unta de andan Touristn aus da ganzen Wäid gor ned auffoin. Aba de Bergbahnkartn is hoid a weng deia! Do san uns scho de andan Araba liaba, de gnua Gäid füa de Bahnkartn dabei ham und se no de neie Zugschbitz-Händidaschn XL aus Fäiz mit hochwertiga Zugschbitz-Schdickerei für des neie Samsung-Gäläxi-Händi kaffan, mit dem s‘ iatz olle de Haglkörndl fotografiern, wo‘s grod obahaut. Ja, dann liaba bei dem schlechtn Weda wieda obe, damit da Bergschwindl aa wieda vageht. Aba des dauad, weil iatz gschätzt fünfhundad Leid oschdähn.
Oamei im Lem muaß ma omgwen sei, aba öfta ned. Des moant
Euer Kultualeser
Vinzenz Summerer