Kirch mit Klo

Liabe Kultuaredaktion,

wenn ma furtfahrt, dann lernt ma wos dazua. Und wenn ma dann in fremde Lända fahrt, lernt ma no mehra. Andere fahrn ja weit furt: auf de Seischelln und auf Lanzarote, in Australien und Thailand muaß ma aa scho gwen sei und auf New York, Paris und Barcelona fliagt ma amoi schnäi zum Schoppn hi.

I bin mit meim oidn Ope auf Holland umegfahrn, ned weid, so fuchzg Kilomete hinta de Grenz. Ma muaß kloa ofanga. Eigentlich war‘s ned Holland, des is nämli a andare Provinz in de Niedalande, sondan de Provinz, wo i war, hoaßt Gelderland. Jedenfois is des Land wirklich nieda, oiso ganz flach, aba Gäid hob i in Gelderland a ned mehra gsehng wia wo andascht, weil der Nam nämli vom Herzogtum Geldern kimmt. Ma fahrt dort ganz schdaad mit‘m Auto mit achzge dahi, damit ma se ned an de groußn Alleebaam darent, wo an jeda Schdraaß schdehn. Übahoin derf ma praktisch net, aba dafüa fahrn sogor de Bulldoggfahra freiwillig in de Ausweichn ausse, wo olle fünfhundad Meta keman. In dem Land duat‘s oiso aa a oida Ope, do braucht ma koan Suff!

Auf Züpn hinte bin i mit meina Frau gfahrn. Schreim duat ma des Zuthpen und sei duad‘s a oide Hanseschdod, a bissal kleana wie Rousnam, aba väi äida, mit Schdodtore, und a Schdodmaua und an Haufa oide Häusa vo fuchzenhundad iagendwos. Und a boor oide Kirchn hod‘s aa ghabt, bsundas de Walburgiskerk mit da größtn niedaländischn Orgl aus da schbaadn Renesanz und da größtn Kettenbibliothek, wo de uroidn Bücha an da Kettn hängan, damit’s ned gschdoihn wern.

Wos aba des Interessanteste an dera Kirch is, is des grouße weiße Klohäusl mittn im Seitnschiff. Üba des gfreid se de deitsche Turistin (mei Frau) bsundas. Da deitsche Turist (i säim) gfreid se aba weniga üba de oide Orgl, wenn agrad, wenn a do is, a Orglkonzert mit Blockflötngschbäi dazua ogeht und des de Turistin partu ohörn möcht. I gib‘s zu, es war dann scho schee, aba es muaß ned sei.

In da nachstn Kirch, a gotischn, hod‘s aa a Klo gem und no väi mehra Biacha, denn des war a ehemalige Klousdakirch und is heid de Schdodbibliothek vo Züpn. Scho schod, wenn a Kirch koa Kirch mehr is, aba des gibt’s bei uns aa. Auf da Herrninsl is da Dom zur Brauerei worn und schdäht iatz seid üba hundadfuchtzg Johr ganz laar. Do is ma dann scho a Bibliothek liaba! In dem Züpn war übrigens scho no mehra zum Sehng, aba des werd iatz z‘lang. Jedenfois hob i ma dann am Wochamarkt no an Reankn Kaas kafft. Wos sunst? Guad war a.

Des woaß