Liabe Kultuaredaktion,
vor hundad Johr hod da Eisner Kurt den Freischdaad Bayern ausgrufa, aa wenn des de CSU heid no ned glaam kon, dass des a Soze gmacht hod, wo doch Bayern angeblich a Erfindung vo da CSU is. Jedenfois war danoch da Kine, da dritte vo de Ludwigs, obgsetzt und is auf Wäidnwart und schbaada auf Anif, des is glei do nebam Soizburga Tierpark, gflücht. Vorbei war‘s endgültig mit da Monarchie. Aba es is ja scho zwoaradreißg Johr voher a Kine gschdürzt worn, sei Neffe, unsa Märchenkine, da Ludwig, da zwoate. Eigentlich war‘s vo do ab scho vorbei gwen. Bayern war grod no scheinbar a Königreich. Des Song ham de Preißn z’Berlin und de fränkischn Minista und Beamtn ghabt.
Neilich war i mit’m Mimpfdinga Pfarrausflug beim Ludwig dahoam. Dort wo‘s eahm bsundas gfoin hod, im Groswangdoi, in seim Schloss Linderhof. Schee war‘s, da Himme blau, de Herbstbladl im Park fast so goidan wia de Pracht im Schlössal. Dem siecht ma’s übrigens ned o, dass des eigentlich a Hoizständabau is, wo ma easchd schbaada Mauan umadum baud hod. Drin hod‘s gleicht vor lauta Goid. Aba dann hod da Schlossführa gsogt, dass des ois grod Blattgoid is, hauchdünn auftrong. Unsa Padda, übrigens a ganz an netta, der is aus Indien. Er häd gmoant, bei eahna dahoam in de indischn Schlössa vo de Maharadschas waar des ois massiv und ned bloß a Blattgoid.
Übrigens de andare grouße Sehenswürdigkeit nebam Schloss, de Venusgrottn, is zuagschbead. Da Beton is noch hundadvierzg Johr marod. Gscheida, de Grottn waar aus Schdoana und Fäisn baut worn oda grod aus Hoiz mit onepapptn Gips. Jetzt renoviern s‘ scho Jahre lang hi und es werd oiwei deira. Wer schnella fertig is, da Flughafen in Berlin oda de Grottn, des woaß ma ned.
Aba sunst war‘s scho schee dort in Linderhof. Und de Touristn warn weniga und de Pommes und de Currywurscht väi billiga wia auf da Herreninsel. Bloß de Kuckucksuhren für de Japana san dort genau so deia. Aba do muaß ma aa scho gnua valanga, damit’s füa de Japana wos wert san. Füa hundat Euro kafft da koa Japana a Kuckucksuhr ob. De muaß scho mindestends des Doppete bis Vierfache kostn, damit’s wos wert is, de Uhr. Mit am billign Mitbringsl kon ma se in Japan ned sehng lossn. Do muaß da Japana dann allerdings des Schäidl „Made in China“ vorher obamacha. Hauptsach da Schein schdimmt, da goidane Schein, da Schein vom Echtsei oda einfach da Gäidschein, füa de wo‘s Gschäft machen. So a Schein is hoid oiwei wos Schöns.
Des moant
Euer Kultualeser
Vinzenz Summerer