Liabe Kultuaredaktion,
Aa wenn‘s bei uns dahoam am Scheenstn is, soid ma se doch adiam aussetraun in de Wäid und wos Neis kennalerna, zum Beischbäi ausse auf Niedabayern. Füa uns Mimpfdinga fangt Niedabayern ja praktisch glei hintam Chiemsää o, aba säim de Mäidarfa moanatn, sie waarn no Obabayern. Ab is ja wurscht. Jedenfois glei hintam Hooga Turm, der friahra amoi des Schloss vom dortign Grafn war, geht boid Niedabayern o und scho is ma in Landshuat, da Hauptschdod vo Niedabayern. Weil se im Mitteloidda de Wittlsbacha beim Erbn ned einig warn, hods damois glei vier boarische Herzogtüma gem, oans war Baiern-Landshuat. Und so a niedaboarischa Teil-Herzog hod dann aa a grouße Burg braucht. De Burg obahoib vo da Oidschdod hob i ma mit meina Frau ogschaut.
Trausnitz is da Nam vo da Burg. Des hoaßt so väi wia „Trau di net“, damit jeda Feind glei woaß, do kimmt a ned eine. Heit kaamat ma scho eine, und vo außen schaut de Burg aa ganz schee aus, so dass ma gmoant häd, es daad an dem scheena Sonndogmiddog recht zuageh. Aba nix war los, koane zehn Leit war ma bei da Führung. Mir san dann scho drauf kema warum. De Burg is 1961 zwengs am elektrischn Tauchsiada fast ganz obbrennt. Und wos is mitobbrennt? Acht Zimmer vo unsam Kine Ludwig, de wo a se dort extra ganz prozad hod eirichtn lossn. Und da Freischdaad hod bis heit koa Gäid ghabt, dass ma innen wieda ois herricht. Nix is‘ in Landshuat auf da Burg Trausnitz mit am zwoatn Neuschwanschdoa, koane zehntausend Japana, Preißn und Kinesn keman am Dog!
Aba es gibt dort doch zwoa bemerkenswerte Sachan. Des oane is de Schbeiskartn vo da Burgschänke, wo ma an Schweinsbron mit Sauakraut erwartn daad. Aba na, des Essn waar eha wos füan Kine gwen ois füa mi: Jacobsmuscheln, Karotten-Ingwer-Suppn, Trüffel-Tagliatelle dazua a Mediterran Salat Bowl, wos imma des is, und a Antnburst mit Teriyki-Soß und am Schluss a Matcha-Kokos-Mousse, Mahlzeit! Muaß i des hom? Aba no wos hod de Burg. Wenn ma aa üba de Schbeiskartn dischkriern kannt, üba oans kon, ja muaß ma se fast einig sei: De Herzogin hod auf ihram Plumpsklo den scheenstn Ausblick auf de Schdod ghabt. I kenn grod no an scheenan Kloblick. Der is in da Burg Prösels in Süddiroi. Do schaut ma direkt auf’s Schlernmassiv. Aba soichane Berg hod’s hoid in Niedabayern ned, sunst waar‘s ja aa ned Niedabayern. Jedenfois, wenn‘s amoi zufällig in Landshuat vorbeikemt‘s: Traut‘s eich eine!
Des moant
Euer Kultualeser
Vinzenz Summerer