Ois oaschichtiga Mo bist a Lattierl und fredst so durchs Lem. Alloa beim Kocha kemman Sachan außa, dass da Sau graust. Do gibts dann Kreationen, de de Woid no ned kennd. Er erzoid ganz stoiz, dass er heid auf da Nacht kocht hod. A Sauakraut hod a se gmachd. „Und geschmeckt hod des ganz wundabar.“ „A Sauakraut alloa reißt mi iatz ned ganz vom Hocka“, hod sei Spezi gmoand. „Na, na, da war no a Lebakas dabei. Weil Sauakraut mid Lebakas ganz guad schmeckt“, hod er vazoid. „Des is doch koa Zammastand ned“, ham seine Tischspezen gmoand. „Do muassd a gsoichds Wammerl hernehma. A Lebakas im Sauakraut, do is da ja zum Grausn“, hams gmoand. Da is da Koch gachgiftig worn. „Ihr habts von nix a Ahnung, aba vom dem vui. Wurst is Wurst, ois wenn des ned egal war, ob i a Wiena oda an Lebakas nimm. Mia hods gschmeckt“, is retour kemma.
Da passd des grod dazua: Zwoa san beim Fischn gwen. Um 11 hod da anda gsagd: „Iatz muass i hoam, denn heid muass i kocha. Es gibd Schinkennudeln, und an Lebakas hob i scho kloa gschnien.“
Wia hoaßd es bei Wilhelm Busch: „Und jeder schmunzelt, jeder nagt nach Art der Kannibalen. Bis man dereinst „Pfui Teufel sagt zum Schinken aus Westfalen.“ Josef Bauer