A Soizburga und a Muidorfa in besda Tradition vaeint, san nach London gflogn, um se de Dart-WM im Ally Pally zum O‘schaun. A Drum Gaudi wars, wia de Pfeile-Werfa kämpft ham und ois war schee und guad nah beinand. Maskn hams eh ned brauchd, und so war des Dart-Wochenende a scheens Erlebnis.
Dann sans wieda mim Fliega nach Minga, und von dort aus woidns nach Muidorf und Soizburg. Den Muidorfa hams wieda einalassn, den Soizburga ned, weil der aus an Hochrisikogebiet kimmd. Da ham de in Minga koan Vawandn kennd. Sie ham den Soizburga ins Flugzeug gsetzt und nach London retour gschickd.
Von London nach Soizburg gehd direkt koa Fliega. Er hod no an Platz in da Maschin nach Wien dawischt. De is aba ned vom dem Flughafen ganga, an dem er gland is, sondan er hod durch ganz London miassn, damid er zumindest wieda nach Östarreich kimmd.
Am Flughafn nach Wien hod a se vorm Eisteign testen lassen miassn. De Testarei is ned guad ausganga, und se hamd na ned in den Fliaga Richdung Hoamad lassn. Er hod in ganz a scheens Hotel neban Flughafn in Quarantäne miassn. Nix wars mid „Oh Du mein Österreich“ und mid „Mei Hoamad, mei Salzburg“.
De Zwoa ham ned nua de Zahnarei vo de Freind aushoidn miassn, so a Dart-Wochenende in London konn ganz schee ins Goid geh.