A Muidorfarin hod dem ihr vom lieben Gott zuagwiesna Ehemo erklärd, dass de Tant in Amerika hint 98 Jahr oid werd und sie umefahrd, weil ma ned woas, wie lang de Tant no lebt. „Dann fliagst hoid“, war sei Kommentar.
Er hod sei Wei zum Flughafn gfahrn und is wieda retour noch Muidorf. In zehn Dog woid de Muidorfarin wieda hoam kemma, weil ihr zehn Dog für Amerika leicht glangan.
Da Rückflug is am 27. September, hod sie auf an Zettl gschriem und hod den Zettl im Wohnzimma von eahnan Häusl deponiert. Er hod des a so vastandn, dass seine durch göttlichen Ratschlag eroberte Ehefrau an dem Dog wieda obkoid wern mechd.
Brav wia er is, is a an dem Dog zeitig in de Friah aufgstandn und nach Minga zum Flughafen hig‘fahrn. Denn um 9 Uhr land da Fliega. Pünktlich war er do, hod de rechte Ankunftshalle gfundn und bleibt am Ausgang steh. Dass a na sei Eheglück glei siehgd. An Haufa Leid san durch de Tür kemma, aba sei Wei war ned dabei. Er wart a ganze Stund, doch sei Frau is ned aufdauchd. Dann is a hi zum Schuida von der Fluglinie und had gfragd, wann sei Frau kimmd. De Dame von der Fluglinie hod nachgschaud und eahm dann erklärd, dass sei Eheglück gor ned in dem Fliega war. Er hod 22,50 Euro Parkgebühren zoid und is wieda nach Muidorf gfahrn.
Er hod dann in Atlanta o’gruafa und woid wissen, wo sei Eheglück hikemma is. Da is eahm erkärt worn, dass da Fliega auf da Nacht vom 27. September scho geht, aba der Flug erst am Mittwoch, 28. September, um 9 in da Friah in Minga land.
Da Grant war groß, aba es is nix andas übabliem. Er is am Mittwoch wieda in alla Friah aufg’standn und zum Flughafn gfahrn. Er ho de gleiche Gaudi wia am Dog zuvor absolviert. Da Undaschied war nua, des moi war sie dabei.
Der Zettl mid de aufgschriema Flugdaten war nimma zum finden. Wer iatz z’schuid war, hod se nimma feststoin lassen.