Wer in Muidorf im Schatten von St. Nikolaus aufgwachsn is, dem brauchst ned üba Kirchenglockn aufklärn. Der kennt de Glockn vom hohen Dom in Muidorf auswendig. Um a so a Gleit zum Hörn, da muassd scho weit umanand kemma sei.
Da Huaba Xare, der vor guade 60 Jahr von Muidorf noch Idyllwild im Riverside Country in da Näh von Santa Monica in Kalifornien hint ausgwandad is, hod seine Freind in Muidorf gschriem, dass er heia wieda zum Muidorfa Voiksfest umafliagn werd.
Sein bsondan Schpäzi, an Bäda, hod er vasprocha, dass er des Gleit von Queens Angel in Idyllwild vorspuin werd. In dera katholischn Kirch in Idyllwild is da Xare scho ganz lang Mesna. Da Bäda und seine vom liabn Gott zuagwiesne Ehefrau ham ned gwusst, warum da Xare des dene unbedingt vorspuin woid.
Die Glocken in Kalifornien hint läutn am Sonndog pünktle um 10 Uhr zum Gottesdienst, und da Xare is der, der läut. Am Sonndag is da Bäda pünktlich um 10 Uhr vorm Telefon gsitzt, aba aus dem Idyllwild
is koa Muckara ned kemma. Da Xare hod se ned grierd.
Dann is er draufkemma, dass in Kalifornien neun Stund unsare Zeit voraus san. Um Sieme auf da Nacht hods Telefon endlich g’schäppad und da Xare war dro. „Hosd dei Handy eigschoid, damit du des Leitn von meina Kirch aufnehma konnst?“, hod da Xare gfragd.
Des war a ned, denn mid dem Handy wos aufnehma war ned des seine. Er hods ned kenna, aba sei zuagwiesne Ehefrau is a ganz a firme und hod des mid dem Xare von Idyllwild hint hibrachd.
In trauda Ehegemeinschaft ham sa se dann de Glockn von da Queens Angel o’ghörd. „An St. Nikolaus kimmd des Gleit von dene gwiß ned hi“, hod da Bäda festgstoid. „Wenn a zum Voiksfest wieda kimmd, dann werdn i fragn, warum i mia des o’hörn ham miassn.“