Wenn da Dorsch ned beißt!
A Muidorfa Fischa hod zu sein rundn Geburtsdog a
Roas zum Fischn im Meer vor Norwegn von da Familie geschenkt griagt. Mit dabei bei dera Roas warn drei Sachsn, de er vorher no nia gsehng hod. Ois, was de braucht ham für a oawöchige Fischtour, war im Bus. Dosenbier, Tiefkühlpizza, Hartwürst und ah Schnaps.
Sächsisch hod unsa Muidorfa ned kenna, aba zum Vasteh muassd nua meng und dann werd des scho. Von Sachsen bis zur Ostsee is ganga, dann no mid da Fähre nach Schweden und zum Schluss mid dem Bus bis aufe in da Nähe von Hammerfest und Varda. Ah nördlichas Norwegen gehd gor nimma.
Sie ham eahna Quartier gfundn, san in de Fischareiregeln von Norwegen eingführd worn und dann häds mid da Fischarei auf dem offna Meer losgeh kenna. De Angeln san aba ned brauchd worn, weil des Schiffal ned nausfahrn hod kenna. Wind und Woin warn sauba stark, so dass de Fisch vor Norwegen ned zum Fanga gwen san. Wennst ned fischen konnst, dann muassd de andas beschäftign. Unsa Muidorfa hod sei Hochseegartn ins Eck gestoid, und is zum Schwammalsuacha ganga. Norwegn hod vui Fisch und ah vui Schwammerl. Fisch hod er an dem Dog koan gfangd, aba Schwammal san herganga.
De drei Sachsn und oa Obabayer warn sich einig, dass am nächsten Dog mid dem Fischn im Meer o’gfanga wern. Da Mensch denkt und Gott lenkt. So war des ah in Norwegen und des Wedda is um koa Fünfal andas gwen wia am Dog vorher. Sie hams probiert, san aba ned weit kemma und ham umdrahn miassn, weil de Woin oafach z’hoch gwen san.
Am dritten Dog war in da Fruah des Wedda a Gedicht. Koane Woin und koa Wind. Es war hergricht gwen zum Fischn, aba de Sachsan san ned aufkemma, weils sie sich am Abend zuvor dem Bier zu intensiv gewidmet ham. Um Mittag, wia de Sachsn wieda worn san, san da Wind und de Woin wieda kemma. Da wennst de ned beherrrschn konnst, dann kehrsd da Katz.
Oan Vormittag von dera Woch hams naus fahrn kenna und san zum Fischn kemma. Bei unsan Muidorfa ham a Paar scheene Dorsch bissn. Des hod scho passd. Aba so schnoi fahrd er nimma ins nördliche Norwegen zum Fischn.