Allerheiligen und Allerseelen stengan an diesem Wochende vor da Tür. Beide katholische Feiadog warn früha streng getrennt. Allerheiligen war eigentlich für de Heilign reserviert und Allerseelen für de Doadn. Im Lauf da Zeit san de zwoa Dog aba midnand vaschmolzen.
Allerseelen gehd retour auf des Jahr 998, da hod da Abt Odilo vom Klosta in Cluny den Allerseelendog eingführd. Dem Abt is um de Seelen, de no ned in da vollen Gemeinschaft mid Gott san, ganga und no im Fegfeia bleim miassn.
In Bayern is da Allerseelendog ganz im Zeichn da Vastorbna Vawandaschaft und Bekanntn gstandn. Mid Gebetn soid dene goifa wern, de no im Fegefeia drin san. Weil da Abt Odilo festgstoid hod, „dass Gott ned da Gott da Doadn is, sondan da Gott da Lebendn.“ Ma hod gmoand, dass ma an dem Dog oan von da Vawandschaft aus dem Fegefeia außa betn ko.
Im Laufe da Zeid ham se in Bayern Bräuche und Abläufe an Allerseelen eibürgad. Dazu hod da Allerseeelngang ghörd, der zum Friedhof gführd hod. Dort san de Gräba schee hergricht worn. An de Gräba is bet und des Weihwassa is großzügig gespritzt worn. In da Regel gehd da Pfarra mid sein Bempsel durch de Gräbareihen und bet für de Doadn, dass de den Weg in den Himme findn.
OIs Allerseelenstock werd an dem Dog da Grabschmuck bezeichnet. Neba klassischen Gestecken und Kränzen , wern de Gräba mid ana liebevolln Bepflanzung vasehn.
Zu dem Dog gherd se ah des Allerseelenliacht. Auf jeden Grab soid nach da Übaliefarung a roats Licht leichtn. Des Liacht hod ma vor dem Gräbaumgang o’kennd. Des Liacht soi de Auferstehung und a Lem nach dem Doad symbolisiern.
In Obabayern und bei uns im Landkreis hods ah lange Tradtion zum Allerseelndog gem. Hausfrauen und Bäuerinnen ham zu Allerseelen den Allerseelenwecken bacha, der am Allerseelendog ois sogannter Seelennapf für die arma Mitbürga gedacht war. Da ham se mid dem Spruch bedankt: „Vergelts Gott für de arma Seelen.“