Kurz vor dem 1. Advent geht die Diskussion in vui Haushalten los, ob ma übahaupt no an Adventskranz und an Christbam braucht?
Auf an Küchntisch leng de Prospekte wo ma günstig an Adventskranz kaffa ko. „In Neuäding und Oidäding am Markt konnst ah günstig oan kaffa“, woaß de Frau des Hauses. „Bis noch Neuäding oda Oidäding werd i fahrn um an Adventskranz, des glabsd soiba ned“, sagt da vameindliche Herr des Hauses.
Nach dem Aberndessn is de alljährliche Diskussion o’gangan, ob ma des zu Weinachtn ois brauchd. „Füa uns zwoa so ganz alloa brauch ma doch nimma an Adventskranz und a Christbam. De Enkelkinda keman ah grad oan Dog, da is da Aufwand oafach z’groß“, hod da Ehemo seine jährlich wiedakehrendn Textbaustoa abgliefad.
De eahm vom liebn Gott zuagwiesne Ehefrau is aufganga wia da Dampfnudldoag. „Ohne Adventskranz und Christbam is des für mi koa Adventszeit und koa Weihnachtn neda. Mia kaffan an Adventskranz und an Christbam, wia mia des jeds Jahr in unsana Ehe gmacht ham. Jeds Jahr de gleich Gaudi mir dir, und des nua, weils du z’faul bist dem Christbamschmuck vom Speicha in de guade Stum zum Obatragn“, is sie zintig worn.
Er hod gwußd, dass er mit da christlichn Duldsamkeit ned vui weida kimmd. „Da ganz Aufwand für oa Woch rendierd sich do ned. Mia kennan ah so Advent und Weihnachtn feian“, hod er in de Talkrundn mid seina Frau aufgworfa. Da Punkt für ah friedliche Einigung im Sinne da christlichen Weihnacht „mit Friedn auf Erdn“, is imma weida unwahrscheinlicha worn.
Mia feian Advent und Weihnachtn wia mas von kloa auf kennan. Mia brauchn an Adventskranz mit de vier Kerzen, de ma an jedn Adventssonndag o’zündn und an Christbam mid seina Lichda und Kugeln“, war de klare Absage von seina Frau.
Beim Stammtisch hod er erklärt, dass bei eahm dahoam selbstvaständlich, wia jeds Jahr, an Adventskranz und an Christbam ah in dem Jahr gem werd. „Wia se des hoid bei uns an Weihnachtn kehrd.“