Da 6. Dezemba vor üba 60 Jahr hod fast übamenschliche Kräfte erfordert, an dem Dog is da Nikolaus zwoamoi kemma. Erst im Kindagartn am Krankenhausberg und dann no bei Oma und Opa in da Spitalgassn.
Der im Kindagartn is Vormittdog kemma und war ziemlich kloa und gwampad. Gschimpfd und gwedad hod der, ois warn mia de schlimmstn Kinda auf da ganzn Woid. Wos übahaupt ned wahr war. An Krampal hod er dabei gahbd, denn hob i ois zuatraud, aba wirklich ois, einschließlich, dass er de Kinda in sein Sack steckt und huiflos im Woid wieda aussetzt.
Unsa Schwesda war ah koa Undastützung, denn de hod imma ganz bedeutungsschwar gnickt, wenn Herr Nikolaus wieda bsondas gschimpfd hod. Dann hob ich scho ghoffd, dass de Gaudi vorbei is, aba da hob i direkt vagessn, dass i no ned dro war. Dann is de Gaudi o’ganga. Da Baua Seppi soid zum Stab hoidn zum Nikolaus kemma. „Ois wia der sein deppadn Stab ned soiba hoidn häd kenna“, hob i übalegt. Dann is o’ganga: „Warum i ned schlaf nach Mittag“, woid da Herr Nikolaus wissen. Des muass eahm de Schwesda vazoid ham, de Hindahoidige. Außadem war i da Meinung, dass des an Himme und an Nikolaus nix, aba gor nix o’gehd.
Dann war de Gaudi vorbei und ma is wieda zum Schnaufa kemma, bis ma eigfoin is, de soibige Gaudi kimmd am spätn Nachmittdog scho wieda. In da Spitalgass war de Sach oafach, weil i mia den Platz auf dem Schoß vom Opa frühzeitig gsichad ghabd hob. Dann is da Nikolaus kemma, aba da hod was ned gstimmd. Der war groß und schlank und ned so foaßd wia der am Vormittag. Außadem hod der de Schuah vom Hans Schneida und de Stimm von Hans Schneida ghabd. De hod der am Vormittdog ned gahbd.
Da Schneida Hans war Bauer in da Spitalgassn und koa Nikolaus neda. Irgendwas hod da ned gstimmd. Oana von dene muass a Betrüga gwen sei. Des woid i glei mein Papa sagn, denn der war bei da Polizei. Da is des deppade Stabhoidn wida dazwischn kemma. Dan san ma meine Sündn vorghoidn worn, des war aba ned so schlimm, denn an Betrüga glab i nix, absolut gor nix.
Gwunda hod mi bloß, dass da Schneida Hans den ganzn Dezemba frei umanand glaffa is, denn Betrüga wern eigentlich bei Wassa und Brot eigsperrt, hob i gmoand.