Da Kauf von an Christbam is ois außa oafach. Den Bam is ned Bam und Christbam kon nia ned ah jeda Christbam. Die heutige Glosse richt se nua an Manna. Oiso, de Damen brauchan gor ned weidalesen, denn sie geht des gor nix, aba gor nix oh.
Wenn mia Manna auf ah wirklich friedliche Adventszeit aus san, dann miass ma beim Christbamkaffa aufpassn wia de Hafdlmacha. Da gibd es Grundsätze , de derf ma ned aussa Achd lassn. Da wichtigste Grundsatz is, dass ma seina vom liebn Gott zuagwiesn Ehefrau, Lebnsabschnittsgefährtin und Freundin nia beim Christbamkaffa drei red. Des is ganz alloa Fraunsach. Denn mia Manna vastehn des eh ned. Völlig foisch is zum Sagn, dass des ah scheena Bam war, denn a Mo kon grundsätzlich koa Bam beurteiln. Mia Manna, so de Fraun, sehng grundsätzlich koan schenna Bam neda.
Ma soid ois Mo a ned lang bei oan Bam steh bleim, den dann konnst hern: „Wa mechsd denn mit dem, der schaud aus wia a Fragezeichn oda, siehgst Du ned, dass der auf da andan Seitn a Drum Loch hod.“ Iatz bloß nix sagn, sondan oafach weidageh. Jede Äußerung bringt de weida weg von ana friedlichn Adventszeit. Wenn sie vor an Christbam länga steh bleibt, ned glei hirenna, sondan wartn was sie sagt: „Wos moansd Du? So kon nix passiern. Erst wenn fetstoid, „mei der is aba schee“, des zwoa oda deimoi sagd, dann muassd ihra recht gem.
Ois Mo bisd Du beim Christbamkaffa nua dazu da, den von Deine Ehefrau mid vui Sachvastand und Herzensgüte ausgsuachdn Bam vom Vakaufsplatz bis zum Auto zum Tragn. Ja ned mosan. Dass der z’lang oda z’buschig is. Des bring nua Ärga in de staade Zeit. Wenn da Bam im Auto is, sie o’gschnoid neba Dir sitzt, dann konnsd sagn, dass des ganz a scheena Bam is, so an scheena hama no nia ghabd. Da kimmst da friedlichen und harmonischen Adventszeit scho ganz nah.
Aba no is des mid dem Christbam ned ganz ausgstandn. Des Aufstoin von dem Bam is de letzte große Herausforderung. Ned schimpfa, weil da Bam untn z’groß is und nua schlecht in deen Stända einepasst. Wenn da Christbam steht, dann kon Weihnachtn kemma. Schee staad, friedlich, besinnlich, mid leuchtende Kindaaugn und vui Freud in de Herzn.