Vor unendlichn Zeitn muass se in Ebing a Christbam-Vasteigarung zutrag ham, de bis heut in Erinnerung aller Teilnehmer bliem is. Im Gasthaus von da Gretl Turnhuber hod de Ebinga Feuawehr ihr Christbam-Vasteigarung abghoidn. Des Wirtshaus war so voi wia ma des suacha muss. De Bedienung war de Hedwig, de se mid dem Mute da Vazweiflung gega de Leit im Wirtshaus warf. Vasteigat is ois worn, was ned rechtzeitig aus dem Dirl von dem Wirtshaus nauskemma is. Da dazua ham ah zwoa lebade Gickal gherd, de dera Gaudi ned ganz traut ham. De Gickal wann an ersta Stoi bei da Vasteigarung. Da Schorsch hod gsteigad, dass ma gmoand hod, der braucht den Gickall ums Varrecka zum Lem. Bei 25 Mark hod er ned auslassn und um 27 Mark hod eahm da Gickal gherd.
Mit samt sein Fedavieh ins a in Kuche aus, hod se von da Wirtin a Drum Messa gem lassn und hod im Hof den Gickal mid dem Messa vom Lem zu Tode bracht. Dann hod ah noch an Kiwi mid hoassn Wassa plärrt. Des hod er ois kriagt und da Gickal is nach seim Ablem no sauba mid hoassm Wassa brühd worn.
Dann is da Schorsch wiedas nei in de Gaststum, denn de Vasteigarung is weida ganga. Beim Einigeh steigt da Schorsch da Hedwig auf oan Schuah. „Ehhau“ hod er gsagd und dann is ah an sein Platz ganga. Wia de Hewig an eahm vorbei hatscht, rutscht da Schuah ganz vom Fuaß von da Hedwig. Iatz hod na da Schorsch gahbd. Der hod na packt und hod na an den Christbam highängd, damit der ah vasteigad werd.
Das war ah Drum Gaudi ois de Hedwig strumpfsockad mid oan Schuah durch de Gaststum glaffa is. Aba da Schorsch kennt da koa christliche Gnade. Da Schuah is hängabliem. De Hedwig hod schwar ghoffd, dass wenn der Bam am Schluss vassteigad wird, sie wieda zu ihran Schuah kimnmd. Aba dem war ned so. Der Bam is mid dem Schuah gsteigad worn, aba glei wieda zuruckgem worn. De Gaudi is a hoibe Stund ganga. Bis da Bäda ah Einsehn gabd hod. Der hod dem Bam gsteigad und da Hedwig, de eh scho nimma rund glaffa is, den Schuah wieda gem hod.
Olle warn zufriedn, da Feuawehrkassier, de Wirtin, de Hedwig nua bedingt und da Schorsch auf olle Fälle. „Ah scheene Gaudi. Iatz konn Weihnachtn kemma“, hod er gsagd.