Regensburg is für de Besucha aus Muidorf imma kompliziert. De Mitglieda vom ältesten Stammtisch im Landkreis woidn in de Landeausstellung an an Mondog und de war zua. Ah andara Muidorfa Varein fahrd jeds Jahr im Advent nach Regensburg. Sie schaun an Christkindlmarkt und an Kneitinga oh. Olle zwoa Ziele san höchst interessant. Den san in Muidorf in den Zug nach Regnsburg. Der is bis Neumarkt gfahrn und dann Schienenersatzvakehr. Sie san mit den Bus nach Landshut und von da wieda mid dem Zug weida nach Regensburg. Des hod funktioniert.
Wia dann beim Kneitinga de letzte Hoibe drunga war, sans wieda zum Bahnhof und mid dem Zug nach Landshut, des hod ois funktionierd. Nua in Landshut warns ned de Schnellan, denn sie ham den zwoadn Bus nehma, weil da erste Bus war voi und is eahna davogfahrn.
Wias noch Neumarkt zum Bahnhof kemman is da ersde Bus laar vor dem Bahnhof gstandn. Wia de Muidorfa zum Bahnsteig kemman, sehngs grad no de rotn Lichta vom Zugende nach Muidorf. Dann ham sa seh auf Herbergssuche gmachd und san in da Bahnhofshalle in Neumarkt fündig worn. Koid wars und ned kommod. Aba des hoifd ois nix, denn da nächsde Zug nach Muidorf kimmd erst in oana guadn Stund.
Da Zoaga von da Uhr is auf Achte zua gannga, ois da Herbergswirt kimmd und de Muidorfa aus da Bahnhofshalle in Neumarkt schmeißt. „I hob iatz Dienstschluss und um Achte wird da Bahnhof in Neumarkt zuagsperrt“, hod er de Reisenden wissen lassen. Der hod koa Erbarma ned kennd und koa christliche Nächstnliebe scho glei gor ned.
Dann sans am Bahnsteig gstandn und da koide Wind hods durchebeideld, und des wia. Da nächste Zug nach Muidorf kimmd erst in 30 Minutn und da stehst lang. A Stoi is rund den Bahnhof ah ned herganga, der de warma dadad.
Sauba dafron san dann in den Zug Richtung Hoamad eigstiegn. Iatz hams gwussd, wia des is, wenn außegschmissn werd und ned a Moi a Ochs und a Esl san heganga.