Im Norden da Stod Muidorf hod de Wintakatastrophe Elli mid volla Wucht zuagschlagn. Es war so sakrisch koid, wia des im Schäfflalied vorkimmd. Der Wintasturm hod rund 15 Zentimeter Schnee üba da Kreisstod abgladn. Da muasst scho schaun, ob a Übalem übahaupt no möglich is. Warnungen san kemma, da graust da Sau. Früha hod ma des Winta gnennt, und wega dem Schneefall häd se früha koana aufgregd.
Wia mia erfahrn ham, weil in dera Familie de Friednspflicht no ned ausgsprocha war, hod des Wintachaos durchaus Opfa kost. Ma soid ned ois imma ois Nix abdoa und scho schaun, dass ois beinand bleibt.
Weils gschneibt hod, hod da Herr des Hauses de Einfahrt von seim Haus ramma miassn. Des is scho ganga, denn da Schnee war ned so schwar und da Schneeschaufe-Schwinga no guad beinand. Seine ihm vom liabn Gott zuagwiesne Ehefrau hod er zum Eikaufstempel am Kanal gschickt, damit wieda a Strahsoiz im Haus is. „Du woaßd scho, dass des Stod Muidorf des Soizn von de Einfahrtn vabotn hod“, hod sei Ehefrau eahm wissen lassn.
„Wer de Bürgasteig mit Soiz behandelt, der braucht se ned wundan, wenn da Bürga des für sei Einfahrt genau so siehgd“, hod er kontert und a Schaufe mid Soiz volla Schwung in sei Einfahrt gschmissn.
Da is ah mid da Frau nei ins Haus und de Schneeschaufe hod er an de Garage higloand. Da Kiwe mid dem Strahsoiz is danem gstandn. Am andan Dog beim Frühstück hod sie gsagd, dass des gestern nu grengt hod, und er soid nachschaun, ob die Einfahrt vaeist is. Gfreut hods na ned, aba er is ned auskemma und aus dem Haus auße. Es hod ned lang dauert, dann war er wieda da. „De Schneeschaufe is weg und des Strahsoiz ah. I hob ois abgsuachd und nix gfundn. De bodenlose Schlechtigkeit da Menschheit is unglaulich“, hod er seina bessan Hoifde erklärt. „Wennsd ois in d‘ Garasch grammt hädsd, dann warn Schaufe und Soiz no da“, is von ihra retour kemma.