A Muidorfarin kriegad von ihra Freundin am Samstag auf da Nacht a Whatsapp. Do is drin gstandn, dass sie in Kraiburg vor da Kirch ausgrutscht is und mid Prellungen und oana Platzwundn am Kopf im Krankenhaus in Muidorf liegt. Da Fritz häd sie ins Krankenhaus gfahrn.
De Muidorfarin woid ihr Tochda informiern, de in Alzgern lebt, und hod die Whatsapp weidagschickt. De hod aba erst kurz vor Mittanacht aufs Handy gschaut und is sauba dakemma. D’Mama hods am Handy ned erreicht. Da hod sa se nix denkt und gmoand, dass de im Krankenhaus was zum Schlafa kriagd hod unds Handy ned herd.
Aba an Fritz hods no o’gruafa und woid wissen, was genau passierd is. Da Fritz hod ihra des vazoid und zum Schluss no gsagd: „De Mama hod se des Hirn aufghaud und an Rückn gstaucht und is im Krankenhaus zua Beobachtung, aba sonst gehds scho wieda“.
Am nächsten Dog hod de aus Alzgern ihr Schwesda o’gruafa, de in Freising lebt. Dera hods de ganze Gaudi vazoid. De woid glei nach Muidorf fahrn um zum schaun, wias da Mama gehd. „Du wartst iatz no, denn i geh glei ins Krankenhaus und schau noch da Mama“, hods ihra Schwesda gsagd.
Von Alzgern nach Muidorf ins Krankenhaus des gehd no. Wias am Sonndog in da Fruah vor da Pforte im Mühldorfa Krankenhaus steht und fragt, wo denn ihra Mama liegt, hod de Dame gsagd, dass unda dem Nam übahaupt koana im Krankenhaus liegt. Se hods mid dem Geburtsdatum von da Mama probiert, aba da war ah koane. De von da Pfortn hod dann no gfragd, ob de Mama vielleicht in Oidäding eingliefad worn sei kannt? „Sie woas bloß was von Muidorf“, hod Tochda gsagd.
Dann hods Handy raus und de Mama o’gruafa. De is higanga und gfragd was los is am Sonntag in alla Herrgottsfriah. De Tochda woid wissen, wia ihr Zimmanumma is, aba de Mama hod gfragd, obs spinnd, denn sie is dahoam beim Frühstückn.
Beim Schmatzn is dann ausakemma, dass de Nachbarin von da Mama gschmissn hod und sie de Whatsapp zua Info an Tochda weidgleitet hod. „I hob gmoand, dass ma des am Handy siehgt, von wem de is“, hod de Mama erklärt.