Da Aschermittwoch rückt näha und de Fastenzeit macht des nämliche. Nix mehr mid Hellau und Innau. De Gaudi is vorbei. Im Landkreis Muidorf werns imma mehra, de de vierzigtägige Fastenzeit akkurat eihoidn und sich kasteien.
Laut de Vorgaben von da katholischen Kirch is in dera Fastenzeit a Haufa vabotn. Vazichtn soid ma auf Fleisch, Milchprodukte, Alkohol, Süßigkeiten und Oar. Ois was schwimmt, konn ma essen, unter dera Aussage foid a da Biber, den ma früha hod essen derfa, weil der im Wassa war. Des derf ma nimma, weil da Biber geschützt is und nimma zum Fastenessn daugt.
Wer früha an Butterpfennig an de Kirch zoid hod, der hod se a Befreiung dakaufd. Mit dera Befreiung hod ma Butta aufs Brot wieder schmiern kenna, ohne war da gor nix ganga.
De meistn Manna vazichtn aufs Bier und auf an Wein sowie an Schnaps. Es is scho a Genuss, wennst zuaschaun konnst, wia dene am Aschermittwoch da erste Schluck Wassa am Stammtisch schmeckt. Da vaziehgds des Gsicht in olle möglichen Variationen. Vui vom vom liabn Gott zuagwiesna Ehefraun legn in dene 40 Dog auf absolute Abstinenz wert. Stimmungstechnisch konnst zuaschaun, wia de Manna von Woch zu Woch grantiga und a zunehmende Belastung im zwischenmenschlichen Bereich wern.
In de vierzigtägige Fastenzeit foid am 19. März da Josefitag, ah Namensdog, der wird in Muidorf von de Brunnwiesla mit dem Kulturausflug nach Minga jeds Jahr gfeiad. Wennst nach Minga fahrsd zum Wassadringa, dann is des koa Ausflug neda. Deswegn hod se oana an Joka eifoin lassen. Den ziagd a am Josefidog und derf damit ah in da Fastenzeit in Minga a Bier dringa. Am Dog dannoch goid wieda de strenge Fastnregel.
De 40 Dog vagengan ah, de Laune am Schluss werd imma unausstehlicha, aba an Gründonnrsdog is ois vorbei und de lange Leidenszeit geht dem Ende entgegen. An Ostern is vom Gsoichdn bis zum Bier vom Oar bis zum Speck ois wieda erlaubt.