Früha warn de Fastenpredigten an den sechs Sonntagen in der Fastenzeit Veranstaltungen, de unbedingt zum Besuacha warn. Do is oan scho drastisch vorghoidn worn, dass ma sei Lem total ändan muass. „Mit an volla Magn ist guad fastn“, hod da Pada von da Kanzel oba predigt. A andara Fastenprediga: „Da Heuchla fastet, damit er globt werd, da Geizhois, damit ma sein Goidbeutl voi macht, da Gerechte, um Gott zu Gfoin.“
Da Antonius von Padua: „De Zeit is erfüllt, des Reich Gottes is nahe. Kehrt um und glabd an des Evangelium. Des is de Kernbotschaft der österlichn Bußzeit.“ So a Fastnprediga hod da de Wadl scho firerichtn kenna, wenn er sei Gschäfd vastandn hod.
De Kindagärtn, de früha in Muidorf von Klosterschwestern geführt worn san, ham scho de kloana Kinda vasuachd zum Erklärn, warum de Fastenzeit so wichtig is. In meina Anstalt am Krankenhausberg hod de Schwesda gsagd, dass mia Kinda ah zum Fastn beitragn kenna. Sie hod gsagd, dass de Erwachsenen auf Fleisch, Bier, Schnaps und Wein vazichtn und manche sogar auf de Zigaretten und Süßigkeitn. Mia Kinda hods gsagd kennan 40 Dog lang ganz auf Süßigkeitn vazichntn und des dad im liabn Gott bsonda gfrein, wenn mir da mitmacha dadadn. Bei da Brotzeit san mia beinanda gsitzt und ham gschmatzt, was jäda von uns fastn kannt. Des Gespräch is während dem Mittagessen weida ganga. Die Buchstabn-Nudlsuppn, dies jedn Dog gem hod, war scho ah a Fastenbeitrag gwesen, aba des hamma uns ned sogn draut. Am Nachmittag san ma gfragt worn, was jäda von uns für a Fastenvasprechn abgem dad. Jäda und jede is gfragt worn. Mia is imma no ned eigfoin, was i zum Fastn hernehma soiad. Aba unsa Schwesda war unerbittlich, wia da Engel Gabriel mitm Flammenschwert. Dann war i dro. „Schwesda, i werd in da Fastnezit ned raucha.“ Warum i dann a Stund in da Eck steh hob miassn und Mama in Kindagartn kemma hod miassn, war mir a Rätsel.