Bei seim Stammtisch hod a Muidorfa sein Leid zwecks dem Frühling geklagt, dass des zum Gottsdabarma war, hod er gsagd. „Mit dem Frühling wennst ma ned gehsd“, hod er buifad. Er braucht ums Varrecka koan Frühling neda“, hod er festgstoid.
Seine Stammtischbriada hamd na beruhigt und gsagd, dass er se ned so aufregn soid, denn des is ganz schlecht für de Nervan und des allgemeine Wohlbefindn. Aba mid dem Frühling is eahm ned leichda worn. „Des is a sechana Krampf, da graust‘s da Sau. Da muassd ganz schee krank sei, wenn da ah so a großa Blädsinn eifoid“, hod er weida gschimpfd.
Bis na dann do oana am Disch no gfragd hod, was er gegan den Frühling hod. „Wenn die Natur erwacht, ah leichds Frühlingslüfdal wahd, de Schneeglöckal und Krokusse blühn, dann is doch schee zum Lem nach dem langa Winda“, hod er dagegn koidn.
„Do kennst de übahaupt ned aus“, hod da Frühlingsmuffel zruck grantelt. „Es geht do ned um den Frühling an sich, sondan um den Frühling im Fernsehn“, hod er festgstoid.
Da Manna am Disch ham bedeuungsvoi gnickt. Jeda hod de Gaudi kennt, de am Sonndag auf da Nacht im ZDF kimmd. „Den Krampf miassd ma olle o’schaun“, is einheitlich erklärt worn.
Da Frühlingsgrantla, der de Diskussion zum Laufa brachd hod, hod dann no erklärt, dass de Fastenzeit des Problem no vaschärft hod. „Ja, wia gehd iatz des“, ham di Stammtischbrida gfragd. „Des is ganz oafach, in da Fastenzeit drink i koa Bier neda. Außahoib da Fastzeit scho. Wia da Frühling vor da Fastenzeit kemma is, war ma des wurscht. Da flagg i am Kanape und schlaf. Da is ma wurscht, wos für a Schmarrn in Frühling passiert. Aba in da Fastenzeit drink i bloß Wassa und da schlaf i ned und muass den ganz Frühling von vorn bis hint o’schaun“, hod er sei Leid geklagt. „In dera Fastenzeit werst dopped hart geprüfd“, ham seine Schpäzen festgstoid.