Mühldorf – De Boimprozession mit greane Zweigal und Hymnen erinnert an den festlichn Einzug Jesu Christi in Jerusalem auf dem Buckl von an Esel. Des is seit dem siebten Jahrhundat belegt. Seit dem zehnten Jahrhundert san de Dorfpfarrer in unsana Gegend bei da Boimprozession auf an Esel in de Kirch grittn. Weil da Esel an sich a ziemlich raubukada Deife sei konn und dazu ah no saustörrisch, hams den lebadn Esel durch an hoizan Esel ersetzt, der is ned stehbliem und imma weidaganga. In der Lebensbeschreibung des heiligen Ulrich werd dieser Ritt ausführlich geschildert. Vui Fraun ham auf de Hoizesel ah de kloa Kinda reitn lassan, weil des gega Krankheitn und ah gega Pech im Lem hoifa soid.
Heimatforscha Lorenz Strobl hod außagfundn, dass im Kreis Muidorf bis 1800 Ministranten mit dem Boimesel, der auf hoizana Radl gstand is, auf dem da Jesus saß, durch de Dorfgassn zog worn san. Mit dem Boimliedan is da Boimsegn in de Häusa und Höf kemma.
In da Zeit da Aufklärung san de Boimesel-Umritt schwar in Varuf kemma. Mia ham ja damois no zu Soizburg gherd und unsa Erzbischof, da Hieronymus von Collordeo, hod 1778 und 1782 de Umritt am Boim-Sonndog ganz vabotn. Dem Erzbischof war da Darstellung zu „theatralisch“ und damit wars vorbei mid da Boimeselgaudi. Hundate von hoizane Esel nua in Bayern warn auf oan Schlag arbatslos und nimma zum Braucha. In ganz Bayern soin nua 50 Hoizesel de Gaudi übastand ham. In St. Martin in Landshut und im Germanischen Nationalmuseum in Nürnberg sann no vier übablieme Esel zum O’schaun.
Boimesel warn früha ah de Buam, da mid dem Boim-Buschn ois letzde in de Kirch neikemma san. An Boim-Esel in Kreide ham de Leit abkriagt, den ned mid an sauban Gwand am Boim-Sonndog in de Kirch kemma san. Mid an Werdagwand gehd ma zum Start da Karwochn am Boim-Sonndog ned in de Kirch.
Da oide Brauch in da Familie mid dem Boimesel hod se bis heit ghoidn: Wer in da Familie am Boimsonndog ois letztda aufsteht, der is da Boimesel und konn- se des dann den ganzn Dog üba o’hern.