Soidsame Bräuch herrschtn früha zwischen Deandl und Bua zwengs da Liab an Ostern und in da Fastenzeit. In da Fastenzeit is da Bua ned zum Kammafensta kemma. Zeichen und Blicke warn erlaubt, ah wenn de Liab hell glodad hod.
An Ostern is dann des Kammafenstaln wieda o’ganga, denn de Karsamstagsnacht war ah Freinacht. Am Ostermondog san de Burschn zum Oarbetteln an de Kammafensda da Dirndl kemma. Der Herzbua bekam von sein Madl rote Oar und a Glaserl Birnenschnaps oda Zwetschgenwassa. Des war ah oids Herkemma.
An da Zahl da Geschenkoar is de Zuneigung da Auserwoidn abzoid worn. Übalieferd is, dass da hoamlich Angebetete im westlichn Landkreis bis zu 21 roade Oar kriagt hod. Zoid ham nua roade Oar. Dazu gab no ah Schnupf- und ah Halstüchl. Bei de Oar hods aufpassn miassn wia ah Hafdlmacha. „Gradaus macht garaus“, lautete de Regl. De Oar, de ma gschenkt kriagt hod, de ham ungrad sei miassn, denn bei oana gradn Zahl an Oar wars vorbei mid da Liab und an Schnaps sowie mid de Tüchln. An des Kammafensta hosd nimma aufsteign braucha, weil da do nimma aufgmacht worn is.
In da damalign Gmoa Roßbach bei Neumarkt hod se am 12. April 1901 ah tragischs Unglück zuatragn. In da Nacht des Ostermondags kam zum Kammafensta da Magd des Bauern zu Römersberg da Schmiedsohn von Karger, um se seine roadn Oar abzumhoin. Da muass eahm ah Nebenbuhla aba zuvorkemma sei. Wia se da valiabde Schmied in de Höh schwinga woid, hod eahm sei unbekannda Nebenbuhla de rechde Hand mit dem Messa hoibads durchschnien. Da Schmied is vom Fensta aufn Bodn gfoin. Mid ana Hand de bluad hod, wia wenn ma a Sau obsticht, aba no schlimma war da Herzschmerz, denn er hod ums Varrecka ned gwuassd, wer da vor eahm de ungradn Oar abghoid hod.
Drei, vier Dog danoch hod se de Gaudi aufklärt: Da valiabde Schmied hod des Fensda seina Geliebtn in dera Nacht vafoid und woid zum Fensda vom Buam des Hauses eisteing, was dem übahaupt ned passt hod.