Vom Josefiausflug von Minga retour nach Muidorf kimmst in Situationen nei, da denkst da, dass das gor ned gibt, aba so kemman durch vor. Na, es geht ned um de Vaspätung da Bahn, ned drum, dass de Bahna de Kundschaft so was von egal is, sondan drum, dass Du Wörta hearst, de Du scho lang nimma gheart host. Thann-Matzbach Nacht is ah ned spannenda worn.
Hinta Ampfing sans im Abteil scho gangig worn, denn de übawiegende Zahl da Fahrgäste woid in Muidorf naus aus dem Zug. Mia Profis san sitzn bliem, denn de Hektik von Ampfing nach Muidorf bringt da gar nix, denn da stehts dann in da Schlang an da Dia und kimmst ned vom Zug ausse.
Zwoa junge Deandl hods sauba pressiert und de warn scho auf dem Sprung vom Sitz zum Gang und dann zua Dia. Aba do is nix ganga, denn a Mo hod se in olla Selenruhe im Gang o’zogn und hod übahaupt koane Rühra gmachd, de junge Deandl vorbei zum Lassen.
Schnee langsam san mia nach Oidmuidorfa kemma, de Deandl san an dem Mo imma no ned vorbei kemma. „Bittschön, derf ma vobei“, hod des oane da Deandl gsagd. „Glei“, hod da Mo gsagd und se no langsama o’zogn.
Oana von uns, der ah no sitzn bliem is hod zu de Deandl gsgagd, denkst eich nix, des is sechana Muhackl, den ma schono find, wenn ma von Minga nach Muidorf fahrd. Iatz ham aba de zwoa Deandl offensichtlich ned gwissd, was ah Muhackl is und ham gschaud, wia ah Schwaibal wenns blitzt.
Am frühran Ablaufberg ham de Deandl dann erfahrn, das a Muhackl ah ganz dreckiga, unfreundlicha, unhöflicha, ungehobelter, grobschlechtiga und roha Mensch is. Dann wars in dem Waggon ganz staad. Da Muhackl, de Deandl und mia ham nix mehr zum Sagn ghabd. Da war ausgredt.