A Muidorfa mit seina von liabn Gott zuagwiesna Ehefrau is aus familiären Gründn in de Toskana gfahrn. Dort hods eahna gfoin, doch des Schönste hod amoi sei End, und de Rückfahrt ins hoamtliche Muidorf is o’gstandn.
Er hod seina bestn Ehefrau von olle fazoid, dass beim Hoamfahrn doch de Toskana no a bissal o’schaun kanntn, denn de Toskana is bedeutende Kulturlandschaft und is seit Jahrhundaten landwirtschaftlich geprägt. „Mia fahrn bis Modena auf de Landstraßen und schaun uns de Kulturlandschaft genaua oh“, hod er gsagd.
Sei Auto war in am Oida, wo das von Haus aus koa Navi ned ghabd hod. Ois Navi noch Muidorf soid sei Ehefrau mit dem Handy in de rechtn Hand und de Landkartn in de linkn Hand fungiern. Der Zammstand hod von da Toskana bis Mondea ned funktioniern kenna.
Wias an Haufa Serpentinen bis aufa zua Begspitze gfahrn san, hod er gsagd, dass des foisch sei muass, weil koa Schuidl nach Mondena zum sehgn is. Siehod gmoasad, weil er ned rechts wegfahrn is, wia sie o’gasgd hod. Von dem Moment oh, hod da bömische Wind eiskoid durch des Auto gwahd.
Seine Freind am Stammtisch ham von ähnliche Situationen berichtet. Oana hod vazoid, dass sein eahm zuagwiese Ehefrau zwoa Stund rechts aus dem Fensta gschaud hod, weils da ah kracht hod wega dera Kartnlesarei.
Den nächsde hod vazoid, dass sei erste Urlaub mit seina damaligen Valobtn kurz hinter Verona scho zu Ende war, weil er und sie ewig gstrittn ham, wia ma richtig fahrt zum Campingplatz in da Näh von Venedig.
Wia durch ah Wunda, oda da Fürsprache des heilign Christopherus is undn am Berg wieda ah Schuidl auftaucht, des den Weg nach Modena gwiesn hod. Nach rund oana Stund warns dann in Modena. Da bömisch Wind had nachlassn, das menschliche Navi hod Kartn und Handy weglegn kenna, denn von Mondena is dann auf da Autobahn Richtung Hoamd ganga. Es is hoid wia oiwei: „Wenn oana a Roas machd, dann hod was zum Vazoin.“