Manchmoi kimmsd in Situationen und ma konn gar nix dafür. A scheena Dag mit üba 30 Grad, an Platz im Sommerkella und dann geht’s los. Am Tisch danem, ma soid ah ned zuahören, wenn andane redn, aba wenn sie so laut schmatzt, dass das scho hersd, wennst den Berg zum Sommakella aufegehsd, dann konnst ned aus.
Ma hod scho gspannd, dass an den Tisch da böhmisch Wind eizogn is, weil eahm hods grad beidelt. „So a Drum Bratnsuiz isst ma ned, do werd ma sauba z‘ dick. Außadem is der Haufa Aspik ned gsund“, hod er se o’hehrn miassn. „Ah Suiz is grundsätzlich total ungsund und es war gscheida, er dad a Käsbrot essen, denn des war vui gsünda“, hod sie doziert.
Er hod a Drum Suiz obagsabed und erklärt, dass er koan Aspik ned kennd, sondan nua ah Gelatine und de macht ned dick. „An an hoaßn Sommadag gibds nix bessas wia ah scheene, koide Bratnsuiz und a hoibe Bier im Biergarten. Die Kaasbrot konnst sobia essen, i mags ned“, hod er Widerworte gem.
Sie hod aba ned aufgem und se de Suiz im Sommakella ganz genau o’gschaud. De Besichtigung muass ned guad ausgfoin sei. „Da sind ja große Fleischbrocken drin, die zum Teil auch noch einen Fettrand haben“, hod sie festgstoid.
„De ganzn gsundn Sachan, wia Goiberuam, Gurkal, Zwieben und Oascheim hosd übasehgn“, is von eahm retour kemma. Nachdem da gsundheitliche Aspekt da Bratnsuiz ned zielführend gwen is, is de Taktik umgstoid worn. „Du weißt schon, dass eine Sülze bei uns ein Armeleuteessen war und sonst von niemand gegessen wurde“, hielt sie ihm erbost vor.
Des woaß is scho, dass vom oidhochdeutschn „Sulza“ Soizwassa kimmd, aba mia wissen was guad is und schmeckt. „Drum gönn i Dir Dei Kaasbrot und i mia mei Suiz. Bei uns hoaßd des Lem und lem lassen“, hod er gsagd und mit vui Gnuss de Bratnsuiz zammgessn.