Rosenheim – Des kannt scho sei, dass heid a bissal britschln duad zum Wiesneinzug um äife. Aber liaba a bar Drepfal vo om ois wia so a Rekordsummahitz, bei dera ma se kam bäizn hed kenna in de Biazäita. Und vielleicht hod da Wedagod ja doch a Eihsähng und es nassld gor ned.
Awa oan Mordsdrum Duschara duads heid ollawei. Und zwar dann, wenn de Rosenheima Obabuagamoasdarin wieda weid aushoid mitm Schlegl und mit Karacho aufn Wechsel schlogt. Wechsel, so hoaßt des Messing-Zapfzeigl in Bayern, des de Bauer Gabi desmoi wieda in da Auerbräu-Festhalle ins erste Bierfassl einihaut – wahrscheinlich wieda drepfalfrei, mid ganz vui Gfui und vui Zuiwassa.
Weil beim Ozapfa schpuit de Gabi scho lang in da Tschämpiänslig. Koa Wunda, des is ja heia scho de siebzähnte Wiesn, auf dera sie ois amtierende Obabuagamoasdarin de easte Mass in d‘Häh schdemmd.
Schpannender kanntad des freile im Flötzinger-Festzäit wean. Do gibt’s desmoi a Premiere: Weil da Landrat, da Bärthaler Woife, noch seim Hifoiara no dahoam bleim muaß, zapft heid sei Schtäivadrädda, da Huaba Sepp, des easte Fassl o. Hoffentlich britschlt a ned, da Sepp. Dass d’Leit auf amoi in am groußn Biersää schtähn und nomoi wer ausrutscht – des hätt grod no gfäit. Awa vui wichtiga is, dass da Bärthaler Woife boid wieda gsund is und se a süffige Mass auf da Wiesn schmecka lossn ko. Guade Besserung!
Weil ma scho bei de Boliddigga san: Zum Dischputian gibt‘s heia wieda ollahand – so kurz vor da Landtagswoih. Awa de Rosenheimer Wiesn hod äh ihre ganz eigenen Gesetze. Do kannt se de grouße Boliddigga-Brominenz z’Minga, z’Berlin oder z’Brüssel a Scheim owaschnein. Lebm und lebm lassen – des boarische Urgesetz guit nirgendwo so wia aufm Herbstfest, des füa vui ned bloß a Stickl Hoamat, sondan aa de scheensde, gmiatlichsde, bodenschdändigsde, familienfreindlichsde und wäitoffensde Wiesn überhaupt is. „Mia san a Voiksfest und koa Verbotsfest“, sogt da Hertreiter Klausi, da Wiesnmänätscha vom Wirtschaftlichen Verband.
Des mit da Wiesn füan kloana Gäidbeidl fangt in Rosenheim scho beim Bier o. Acht Euro und neinzg Cent muaß ma heia füa oa Festmärzn aufn Disch legn. So günstig gäht de Mass kaum woanders her – z’Minga scho glei gar ned.
A Obergrenze hamma auf da Wiesn aa ned. Wenn’s eng wead, hoaßt’s bloß: „Gäh weida, hogg di zuawa, ruck ma zsamm und schdemma a Mass!“ Weil an Durscht hams ja olle: Urbayern und Nordliachtl, Eigsessne und Zuagroaste, Zwetschgenmandln und Pfundskerl, feine Maxen und Gscheadhammen, Eigsaamte mid vui Buifa und Noagalzuzla ohne Diredari. Do is für jeden Blotz.
Dafüa gibt’s auf da Wiesn a Untergrenze – awa bloß beim Eischenga vo de Masskriag. Do kennan de Bierdimpfen, Noagalzuzla und Pfennigfuchsa koan Spass.
Dass ma uns wenigstens auf da Wiesn zwoa Wochan lang ned mitm Brennerzulauf owedoa miaßn – dafüa sorgt des Schnapsverbot. Und an Wiesn-Mastaplan, den ham se de Wiesn-Mänätscha vom Wirtschaftlichen Verband und de Brauereien heia mitm Meridian und da BOB eifoin lassen: Wer vo Mondog bis Donnersdog mitm Zug aufd Wiesn kimmt, kriagt a Biermarkerl und a Bilettl füa a Fahrgeschäft gschenkt. Des is amoi a grouße Koalition, de wirklich wos bewegt. Dazua no a saftigs Brathendl, a resche Schweinshaxn oda an eibabbialdn Schdeggalfisch – wenn des koa Mastaplan is!
Ansonsten is wia oiwei ois gricht für an pfundigen Start: D‘Masskriag san gschpült, de Disch poliat. De oide Ledahosn is glüft, as neie Diandlgwand kafft. De Festkutschn san gschmückt, de Rösser fesch außabutzt.
Awa de wiavuite Wiesn is des heia eigentlich? Do wead oiwei wieda gschtrittn an de Biertisch. De meisten Siemgscheidn und Schmarrnkiwen moanan sicher, es waarad as hundatsiemafuchzigste Herbstfest, weil ja Zwoatausendundäife grouß da hundadfuchzigste Gebuadsdog mit am Jubiläumsumzug und Extra-Dog gfeiert worn is.
Des is scho richtig, awa es hod ja seit da erstn Wiesn im Jahr achzähnhundadoanasächzge aa finstere Zeitn gem, wo’s nix zum Feiern gem hod, im Kriag zum Beischpui. Deshoib gibt’s des Herbstfest zwar scho hundadsiemafuchzg Jahr, awa zwoadausendundachtzähn hamma trotzdem erst de sechsadachzigste Wiesn. Darauf a frische Mass!