Über die Bayern-SPD: „Jetzt werdn Sie frogn, ja wo is denn der Schutzengel von der SPD. Sie, der hod an Burnout seit letzten Herbst.
Der hod de Flügel do lossn und is auf Kur ganga.“
Über die Aschauer Turnhalle: „Ham sie des gwußt, dass auf Aschau, die meisten Starkniederschläge in ganz Deitschland oweprassln?
Guad, dass do a paar vui an Schlog ham, des hob i scho gwusst, wenn ma diese ganze Gaudi um den Sporthallenneubau oschaut.“
Über den Verkauf der Firma Kathrein: „Verblühen nach 100 Jahren duat ja de Marke Kathrein, ein ursprünglich rotes Rosenheimer Gewächs
werd jetzt dann blau-gelb-schwedisch. Aba es ändert sich ja wieda moi nix für die Mitarbeiter, song’s. Des oanzige, wos sich sicher ändert –
in der Kantine gibt’s jetzt dann Köttbullar.“
Über die Tiroler Nachbarn: „Liebe österreichische, liebe Tiroler Freunde. Seid’s guad herkemma zu uns? Hod eich de boarische Grenzpolizei doch einelossn? Habt’s eiern dreckatn Schnee aus Kufstoa im Kofferraum mitbrocht und bei uns entsorgt, oder doch glei no bei eich in den Inn gschmissn? So, und jetzt grod extra. Ha, unsa Maut kimmt, trotz eiern Einspruch. Freunde, ma muaß a verliern kenna.“
Über Franz-Josef Strauß: „Apropos Strauß, i muaß direkt moi nocheschaun. wo der zur Zeit is. Do herobn (Anmerkung: im Himmel) hob i eahm jedenfois no ned gsegn.“
Über die Schulschließungen wegen der Schneefälle: „Und grod bei uns, hod ma ja dann im Internet ned nochlesen müassn, wann de Schui ausfoit, sondern wann überhaupts vielleicht moi wieda oane is. Ja, ma muaß scho Rücksicht nemma, wenn die Muttis mit eahnam SUV nimma aus da Garage naus woin, damits eahnane verzongna Schratzn in d’Schui transportieren kennan, bloß weil a kloans Schneewoikal om am Himme steht.“
Über die Klimaschutz-Demonstrationen: „Übrigens, mia dean heid do fei ned für den Klimaschutz demonstrieren, so wia de Unterricht schwänzenden Schüler bei „Fridays For Future“. Obwoi etliche von eich do drunt sicher a grod de Arbat schwanzn. Guad, aba bei manche Bürgermoasta und Verwaltungsleid is eh wurscht, ob de in da Gmoa oda im Amt san oda a ned.“
Zum Taubenfütterungsverbot: „Ja bei uns gibt’s koa städtisches Taubenfütterungsverbot. Bei uns kriagn de Blindn und Tauben aus Politik und Verwaltung
scho no wos.“
Zum neugestalteten Abschnitt der Münchener Straße: „Des is do zwischen Bruckenberg und dem Bus-Bahnhof, wo 16 Buslinien hoitn, aba koa Stadtbus. Do wo ma aufgrund optimierter Schaltung von oana Ampe bis zur andern bloß no steht. Sogar da Herr Borrmann verweilt dort oft an drei von fünf Ampeln, und des geht doch gar ned. Stillstand beim Borrmann, diesem dynamischen Hektiker.“
Zu den Faschingsbällen des Wirtschaftlichen Verbandes: „Gfuismassig werdn de Ballbesucher ja oiwei älter, oda Herr Frey? Drum fangans ja jetzad mit dem Rosen- und dem Stadt- und Landball scho um sieme o, dass dann olle rechtzeitig ins Heim zruckekemman. Beziehungsweise is ja so, dass ältere Leid nimma so spad essen soin.“